جاڭا قازاقستاندا جاساندىلىققا جول بەرىلمەيدى - ەرلان قوشانوۆ

None
None
نۇر- سۇلتان. قازاقپارات - جاڭا قازاقستاندا جاساندىلىققا جول بەرىلمەيدى. بۇل تۋرالى ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

بۇگىن پالاتانىڭ جالپى وتىرىسىنان كەيىن تىلشىلەر ە. قوشانوۆتان جاڭا قازاقستاندا قانداي وزگەرىستەر بولاتىنىن سۇرادى.

«جاڭا قازاقستاندا اشىقتىقتى كورىپ وتىرسىزدار، جاساندىلىقتان كەتىپ جاتىرمىز. جاڭا قازاقستان ءبىر كۇندە عانا قۇرىلا سالمايدى عوي»، - دەپ توقتالدى ءماجىلىس ءتوراعاسى.

«وزدەرىڭىز دە وزگەرۋلەرىڭىز كەرەك. سوندىقتان ءار ادام وزىنە وسى سۇراقتى قويعانى دۇرىس. جالپى قوعامنىڭ وزگەرگەنى ماڭىزدى»، - دەدى ەرلان قوشانوۆ.

بۇدان بۇرىن حابارلانعانداي، ءماجىلىس ءتوراعاسى وتكەن رەفەرەندۋم جاڭا قازاقستانعا جول اشقانىن ايتقان ەدى.

«بىرلىگى بەكەم ەل ەكەنىن كۇللى الەمگە پاش ەتىپ، بولاشاققا نىق سەنىممەن قادام باستى. بىرلىك پەن سەنىم - «جاڭا قازاقستاننىڭ» نەگىزگى تىرەگى. حالقىمىزدا ەرتەڭگە دەگەن سەنىم بار، اۋىزبىرلىك بار، تاتۋلىق پەن تۇراقتىلىق بار. ەندىگى كەزەكتە، پرەزيدەنتىمىزدىڭ ماڭايىنا توپتاسىپ، وسى سەنىم مەن ىنتىماقتى ەسەلەي تۇسۋگە ءتيىسپىز. العا قويعان بيىك ماقساتتاردىڭ بارىنە بىرگە قول جەتكىزۋىمىز كەرەك. رەفەرەندۋم - «جاڭا قازاقستانعا» جول اشتى. ونى حالقىمىز جاقسى قابىلداعانىن كوردىك. حالىقارالىق جانە وتاندىق ساراپشىلار دا ناۋقاننىڭ ءادىل ءارى اشىق وتكەنىن ايتىپ، جاقسى پىكىر ءبىلدىرىپ جاتىر. بۇل - ۇلكەن ءىستىڭ باسى عانا. الىمىزدا بۇدان دا ماڭىزدى ءارى اۋقىمدى جۇمىس كۇتىپ تۇر»، - دەدى ول.

اۆتور: رۋسلان عابباسوۆ

سوڭعى جاڭالىقتار