وتباسىم كيپردەن ورالىپ، بالالارىم قازاقستانداعى قاتارداعى مەكتەپكە بارادى - ساياسات نۇربەك

None
None
نۇر-سۇلتان. قازاقپارات - وتكەن اپتادا عانا ق ر عىلىم جانە جوعارى ءبىلىم ءمينيسترى لاۋازىمىنا تاعايىندالعان ساياسات نۇربەك بالالارىن نەگە شەتەلدە وقىتقانىن ءتۇسىندىردى، دەپ حابارلايدى قازاقپارات ءتىلشىسى.

«ءسىزدىڭ بالالارىڭىز كيپردە وقىپ جاتىر. نەگە وسى ۋاقىت بويى بالالارىڭىز شەتەلدە وقىدى؟ ولاردىڭ قازاقستانعا ورالاتىن جوسپارى بار ما؟ كەلسە، قانداي مەكتەپكە بارادى؟»، - دەپ سۇراق قويدى تىلشىلەر مينيسترگە ۇكىمەت كۋلۋارىندا.

«ونىڭ ءۇش سەبەبى بار، ەڭ الدىمەن جۇبايىمنىڭ دەنساۋلىعىندا كىنارات بار، وعان ناقتى مەديتسينالىق تۇجىرىمداما دا بار. ەكىنشىدەن، بالالارىمدى قازاقستانداعى جەكە مەكتەپتەردە وقىتۋعا قاراجاتىم جەتپەدى، ۇشىنشىدەن، كيپردە بريتاندىق فورماتتاعى جاقسى اعىلشىن مەكتەبى بولدى. ءبىراق، ۋايىمداماڭىزدار، 26-ماۋسىم كۇنى بالالارىم قازاقستانعا ۇشىپ كەلەدى، سىزدەرگە فوتوەسەپ جىبەرەمىن»، - دەپ جاۋاپ بەردى ساياسات نۇربەك.

سونىمەن بىرگە، تىلشىلەر «مينيستر اتانعان سوڭ بالالاردى ەلگە قايتارۋدى ۇيعاردىڭىز با؟» دەگەن سۇراق قويدى.

«مەنىڭ مينيستر بولعانىما ءبىر-اق كۇن بولدى. بۇل ارالىقتا بىردەڭەنى وزگەرتۋ مۇمكىن ەمەس. بۇل شەشىمدى جىل باسىندا قابىلداعانبىز. بالالارىم قازاقستانداعى قاتارداعى مەكتەپكە بارادى»، - دەدى عىلىم ءمينيسترى.

سونىمەن بىرگە، ساياسات نۇربەك ءدىني نانىم-سەنىمى تۋرالى سۇراققا جاۋاپ بەردى.

«قۇدايعا شۇكىر، مەن مۇسىلمانمىن. سالافيزمگە ەشقانداي قاتىسىم جوق. بىلەسىزدەر، اتام مەن اجەمنىڭ قولىندا ءوستىم. اتام نۇربەك سەمەي قالاسىندا تىنىباي مەشىتىندە يمام بولعان. سوندىقتان كىشكەنتاي كەزىمنەن يسلام دىنىنە جاقىن اداممىن. ءبىراق ەشقانداي راديكالدى اعىمدار، سەكتالار، سالافيزمگە قاتىسىم جوق. ونى اشىق ايتۋعا بولادى»، - دەدى مينيستر.

ايتا كەتەيىك، بۇگىن ۇكىمەت وتىرىسىندا ق ر عىلىم جانە جوعارى ءبىلىم ءمينيسترى لاۋازىمىنا تاعايىندالعان ساياسات نۇربەك سالتاناتتى تۇردە انت بەردى.

اۆتور: ايجان سەرىكجان قىزى

سوڭعى جاڭالىقتار