بيىلعى شىلدەدە بەلارۋس ەلىندە قازاقستاننىڭ مادەنيەت كۇندەرى وتەدى

نۇر- سۇلتان. قازاقپارات - قازاقستان پرەمەر- ءمينيسترى ءاليحان سمايىلوۆ بەلارۋس پرەمەر- ءمينيسترىنىڭ ءبىرىنشى ورىنباسارى نيكولاي سنوپكوۆپەن كەزدەسۋ وتكىزدى، دەپ حابارلايدى قازاقپارات.

ايتا كەتەيىك، نيكولاي سنوپكوۆ قازاقستان- بەلارۋس ساۋدا- ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ 17-وتىرىسىنا قاتىسۋ ءۇشىن نۇر- سۇلتانعا كەلگەن بولاتىن. كەزدەسۋ بارىسىندا ءاليحان سمايىلوۆ قازاقستاننىڭ بەلارۋس مەملەكەتىمەن ىنتىماقتاستىقتى ودان ءارى تەرەڭدەتۋگە، ونىڭ ىشىندە ءوزارا ساۋدا جانە ينۆەستيتسيالىق بايلانىستاردى نىعايتۋعا باسا نازار اۋداراتىنىن اتاپ ءوتتى.

«ەكىجاقتى تاۋار اينالىمىن ۇلعايتۋ جانە ەكى ەل اراسىنداعى ساۋدا- ەكونوميكالىق كووپەراتسيانى دامىتۋ ءۇشىن بارلىق مۇمكىندىك بار دەپ سانايمىن»، - دەدى ق ر پرەمەر- ءمينيسترى.

قازاقستان ۇكىمەتى باسشىسىنىڭ ايتۋىنشا، بۇگىنگى تاڭدا ونەركاسىپتىك كووپەراتسيا سالاسىندا بەلارۋس تاراپىمەن بىرلەسىپ، جالپى سوماسى $100 ميلليون 7 جوبا جۇزەگە استى. قۇنى $14 ميلليون تاعى 2 جوبا قولعا الىندى، سونداي- اق جاڭا جوبالار پىسىقتالىپ جاتىر. ءوز كەزەگىندە نيكولاي سنوپكوۆ بەلارۋس رەسپۋبليكاسىنىڭ قازاقستانمەن بارلىق باعىتتا ءوزارا ءتيىمدى قاتىناستاردى كەشەندى دامىتۋعا مۇددەلى ەكەنىن اتاپ ءوتتى.

«ءبىز - ۋاقىت سىنىنان وتكەن سەرىكتەستەرمىز، سوندىقتان ءبىزدىڭ مىندەتىمىز - بارلىق سالالاردا ىنتىماقتاستىقتى ارتتىرۋ جانە تەرەڭدەتۋ. ونىڭ نەگىزى وندىرىستىك كووپەراتسيا جانە ەلدەر اراسىنداعى ءارتۇرلى بيزنەس بايلانىستاردى نىعايتۋ»، - دەدى بەلارۋس رەسپۋبليكاسىنىڭ ءبىرىنشى ۆيتسە- پرەمەرى.

كەزدەسۋ بارىسىندا تاراپتار قۇرىلىس، اۋىل شارۋاشىلىعى جانە ەنەرگەتيكا سالاسىنداعى بىرلەسكەن جوبالاردى ىسكە اسىرۋ، ازاماتتىق اۆياتسيا سالاسىنداعى ءوزارا ءىس- قيمىل، سونداي- اق 2022 -جىلعى شىلدەدە ۆيتەبسكىدە «سلاۆيان بازارى» حالىقارالىق ونەر فەستيۆالى اياسىندا قازاقستاننىڭ بەلارۋس رەسپۋبليكاسىنداعى مادەنيەت كۇندەرىن وتكىزۋ ماسەلەسىن تالقىلادى.