كوروناۆيرۋستان ەمدەۋ نىساندارىنىڭ قۇرلىسىن ەگجەي-تەگجەيلى تەكسەرۋ قاجەت - دەپۋتاتتار

«كەيبىر مالىمەتتەرگە سايكەس، BI Group جەكەلەگەن كوروناۆيرۋس گوسپيتالدەرىن سالۋ كەزىندە وڭىرلەردە بۇزىلعان عيماراتتاردىڭ قۇرىلىس ماتەريالدارىن پايدالانعان. اتاپ ايتقاندا، اتىراۋ وبلىسىنىڭ وپورنىي كەنتىندە تشو قىزمەتكەرلەرىنە ارنالعان جاتاقحانا بولشەكتەلگەن. ال قۇرىلىس ماتەريالدارى قۇنى 5,5 ميلليارد تەڭگە بولاتىن مودۋلدى كوروناۆيرۋس اۋرۋحاناسىن سالۋ ءۇشىن الماتىعا جىبەرىلگەن. جوعارىدا اتالعان ەلدى مەكەن اتىراۋ قالاسىنان شامامەن 300 شاقىرىم جەردە ورنالاسقان»، - دەدى جامبىل احمەتبەكوۆ ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى رومان سكلياردىڭ اتىنا جولداعان ساۋالىندا.
سونىمەن قاتار دەپۋتات شىمكەنتتە جانە الماتىدا ەكى مودۋلدى اۋرۋحانانىڭ ساپاسىز سالىنعانىنا، قاراجاتتىڭ ورىنسىز جۇمسالۋىنا بايلانىستى سىبايلاس جەمقورلىققا قارسى قىزمەت ءىس قوزعاعانىن اتاپ ءوتتى. ال الماتى گوسپيتالىن سالۋ بارىسىندا مەملەكەتكە شىعىن كەلگەنىن اۋديتورلىق تەكسەرۋ راستادى. تەرگەۋ ناتيجەسى ءالى جاريالانعان جوق. وسىعان بايلانىستى ول قازاقستان حالىق پارتياسىنىڭ دەپۋتاتتارى اتىنان ءتيىستى ۇسىنىستارىن جاريالادى.
دەپۋتاتتىڭ پايىمىنشا، 2020-2021 -جىلدارى BI Group وڭىرلەردە كوروناۆيرۋس گوسپيتالدەرىن قالاي سالعانىن، ولاردىڭ قالاي جۇمىس ىستەپ تۇرعانىن، مەديتسينالىق قىزمەت كورسەتۋ ساپاسىن ءجىتى تەكسەرۋى كەرەك.
«يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى كوميتەتى، قازاق قۇرىلىس جانە ساۋلەت عىلىمي- زەرتتەۋ مەن جوبالاۋ ينستيتۋتى ساراپشىلارىن تارتا وتىرىپ، 2020-2021 -جىلدارى BI Group وڭىرلەردە سالعان كوروناۆيرۋسقا ارنالعان نىسانداردىڭ قۇرىلىسىنىڭ سمەتالىق قۇنىنىڭ ساپاسى تۇرعىسىنان ەگجەي- تەگجەيلى جانە اشىق كاسىبي اۋديت جۇرگىزۋى كەرەك»، - دەدى ج. احمەتبەكوۆ.
اۆتور: رۋسلان عابباسوۆ