بيىلعى ۇ ب ت قالاي وتەدى

نۇر-سۇلتان. قازاقپارات - ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ بيىلعى ۇلتتىق ءبىرىڭعاي تەستىلەۋدەگى جاڭاشىلدىقتاردى جاريالادى، دەپ حابارلايدى قازاقپارات.

سونىمەن، بيىلعى ۇ ب ت- دا نە وزگەرەدى جانە سول قالپىندا قالادى:

- تۇلەكتەردىڭ ءوتىنىشى مەن قالاۋىن ەسكەرە وتىرىپ، بيىل گرانتقا ۇمىتكەرلەرگە ۇ ب ت- نى ەكى رەت تاپسىرۋ مۇمكىندىگى بەرىلدى.

بۇل رەتتە تالاپكەرلەر ەكى مۇمكىندىكتە بەيىندى پاندەردىڭ ءبىر كومبيناتسياسىن عانا تاڭداي الادى.

- «قۇقىق» ءبىلىم سالاسى بويىنشا شەكتى بال وزگەردى جانە 75 بالدى قۇرادى. ءبىلىم بەرۋدىڭ باسقا سالالارى بويىنشا وزگەرىستەر جوق.

- ۇ ب ت- نىڭ بازاسىنا «قازاقستان تاريحى» ءپانى بويىنشا تەست تاپسىرمالارىنىڭ سانى وزگەرىسسىز ساقتالا وتىرىپ كونتەكستىك تەست تاپسىرمالارى ەنگىزىلدى.

- ەرەكشە ءبىلىم بەرۋ قاجەتتىلىگى بار بالالارعا قوسىمشا تەستىلەۋ ۋاقىتى (40 مينۋت) بەرىلدى. سونىمەن قاتار، ولارعا سۋرەتسىز، سىزبالارسىز جانە دياگراممالارسىز تەست نۇسقالارى جاسالدى.

- ۇ ب ت بارىسىندا كومپيۋتەر ەكرانىندا كالكۋلياتور، مەندەلەيەۆ كەستەسى، سونداي-اق مەتالداردىڭ بەلسەندىلىك قاتارى قوسىلعان تۇزداردىڭ ەرىگىشتىك كەستەسى بولادى.

- ۇ ب ت- عا قاتىسۋشىلارعا تەستىلەۋ اياقتالعاننان كەيىن ەكراندا، سونداي-اق جەكە كابينەتىندە جەكە تاقىرىپتىق تالداۋ قولجەتىمدى بولادى.

بۇل تەستىلەنۋشىلەرگە ءار ءپاندى مەڭگەرۋ دەڭگەيىن تۇسىنۋگە مۇمكىندىك بەرەدى.

- اكادەميالىق ادالدىقتى ساقتاۋ ماقساتىندا تەستىلەنۋشىلەردىڭ تەست نۇسقاسى تاڭبالاناتىن بولادى. ياعني، ۇ ب ت- نىڭ ءار قاتىسۋشىسىنىڭ جەكە تەست نۇسقاسى بولادى.

ەرەجە بۇزعان نەمەسە تەست تاپسىرمالارىن اۋديتوريادان شىعارۋعا تالپىنعان جاعدايدا ەرەجە بۇزۋشىلار انىقتالىپ، ولاردىڭ ناتيجەلەرى جويىلادى.

اقپاراتتىق قاۋىپسىزدىك ماقساتىندا تەستىلەۋ «1 كومپيۋتەر - 2 كامەرا - 1 تەستىلەنۋشى» قاعيداتى بويىنشا جۇرگىزىلەدى. ەندى ءار تەستىلەنۋشىنىڭ تەست تاپسىرۋ ورنىندا جەكە باسىن (Face ID) سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (فرونتالدى) كامەرا ورناتىلعان.

2022-جىلعى تۇلەكتەر ءۇشىن ودان دا كوپ ءبىلىم ورتالىقتارىنىڭ قولداۋىمەن تەگىن ونلاين ساباقتار جۇرگىزىلىپ جاتىر. ساباقتار ورتالىقتاردىڭ YouTube ارناسىندا تىكەلەي ەفيردە وتەدى، ولار مىندەتتى تۇردە ساقتالادى.

وسىلايشا، تەستىلەنۋشىلەر ىڭعايلى جانە قوبالجۋسىز ۇ ب ت تاپسىرۋى ءۇشىن بارلىق جاعداي جاسالىپ جاتىر.

ەستەرىڭىزگە سالا كەتەيىك، تەستىلەۋ ورتالىعى ۇ ب ت-2022 بەينەجازباسىن كۇنتىزبەلىك جىل سوڭىنا دەيىن قارايدى، سوندىقتان بارشا تالاپكەرلەردى اكادەميالىق ادالدىقتى ساقتاۋعا شاقىرادى.