سىرتقى ىستەر ءمينيسترىنىڭ ورىنباسارى تاعايىندالدى
نۇر-سۇلتان. قازاقپارات - مەملەكەت باسشىسىنىڭ وكىمىمەن ەرمۇحامبەت بولاتپەك ۇلى قونىسپايەۆ قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى لاۋازىمىنا تاعايىندالدى.
بۇل تۋرالى قازاقپارات ءتىلشىسى اقوردانىڭ سايتىنا سىلتەمە جاساپ حابارلايدى.
ول 1976 -جىلى 8-قازاندا الماتى قالاسىندا تۋعان. ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىن بىتىرگەن. سونداي-اق احەن قالاسىنداعى رەين- ۆەستفال تەحنيكالىق ۋنيۆەرسيتەتىنىڭ ماگيستراتۋراسىن ەۋروپالىق زەرتتەۋلەر ماماندىعى بويىنشا ءبىتىردى.
قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ءبىلىم بەرۋ ستيپەندياسىنىڭ تۇلەگى. ديپلوماتيالىق قىزمەتىن ق ر سىرتقى ىستەر مينيسترلىگىنىڭ جۇيەسىندە 2001 -جىلى ەكىجاقتى ىنتىماقتاستىق دەپارتامەنتىنىڭ اتتاشەسىنەن باستادى.
2002 -جىلى قازاقستاننىڭ گەرمانياداعى ەلشىلىگىنە اتتاشە بولىپ جولداندى. 2003-2007 -جىلدارى قازاقستاننىڭ اۋسترياداعى ەلشىلىگىندە اتتاشە، ءۇشىنشى جانە ەكىنشى حاتشى قىزمەتىن اتقاردى. 2008 -جىلى ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنە اعا كەڭەسشى رەتىندە جۇمىسقا اۋىستى.
2008-2014 -جىلدارى قازاقستاننىڭ گەرمانياداعى ەلشىلىگىنىڭ ءبىرىنشى حاتشىسى جانە كەڭەسشىسى بولىپ جۇمىس ىستەدى. 2014 -جىلعى قاراشا ايىندا سىرتقى ىستەر مينيسترلىگىنىڭ سىرتقى ەكونوميكالىق ساياسات دەپارتامەنتى ديرەكتورىنىڭ ورىنباسارى بولىپ تاعايىندالدى.
2017 -جىلدىڭ تامىز ايىنان قازان ايىنا دەيىن س ءى م ەۋرازيالىق ينتەگراتسيا دەپارتامەنتى ديرەكتورى بولدى. II دارەجەلى كەڭەسشى ديپلوماتتىق دارەجەسى بار. نەمىس جانە اعىلشىن تىلدەرىن بىلەدى. ۇيلەنگەن، ءۇش بالاسى بار.
