قاسىم-جومارت توقايەۆ جامبىل وبلىسىنىڭ جاڭا اكىمىنە تاپسىرمالار بەردى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ جامبىل وبلىسىنىڭ اكىمى نۇرجان نۇرجىگىتوۆتى قابىلدادى، دەپ حابارلايدى اقوردا.

قاسىم- جومارت توقايەۆقا بيىلعى ءۇش ايداعى ءوڭىردىڭ دامۋ كورسەتكىشتەرى مەن پرەزيدەنت تاپسىرمالارىنىڭ ورىندالۋ بارىسى جانە الداعى جوسپارى تۋرالى باياندالدى.

وبلىس اكىمىنىڭ ايتۋىنشا، وڭىرگە تارتىلعان ينۆەستيتسيا كولەمى 63,1 ميلليارد تەڭگەگە جەتكەن.

سونىمەن قاتار، بيىل وڭىردە قۇنى 100,5 ميلليارد تەڭگە بولاتىن 15 ينۆەستيتسيالىق جوبا ىسكە اسىرىلىپ، 1000 نان استام جۇمىس ورنى اشىلادى دەپ جوسپارلانىپ وتىر.

2025 جىلعا دەيىن 75 ينۆەستيتسيالىق جوبا جۇزەگە اسىرىلادى. نۇرجان نۇرجىگىتوۆ مەملەكەت باسشىسىنا 2022-جىلى جامبىل وبلىسىندا 810 مىڭ شارشى مەتر تۇرعىن ءۇي سالىنىپ، 25 ەلدى مەكەنگە اۋىزسۋ، 17 اۋىلعا گاز تارتىلاتىنى جونىندە مالىمەت بەردى.

سونىمەن قاتار وڭىردەگى ەگىس القابى 9,2 مىڭ گەكتارعا ۇلعايتىلىپ، اۋىل شارۋاشىلىعى تەحنيكاسى 11 پايىزعا جاڭارتىلاتىنىن ايتتى. ءوڭىر باسشىسىنىڭ ايتۋىنشا، پرەزيدەنت تاپسىرماسىنا سايكەس الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ جۇمىستارى جۇيەلى تۇردە اتقارىلىپ جاتىر.

سونداي-اق گۆاردەيسك اۋىلىنداعى بيولوگيالىق قاۋىپسىزدىك پروبلەمالارى جونىندەگى عىلىمي- زەرتتەۋ ينستيتۋتىنىڭ بازاسىندا وتاندىق يممۋندىق پرەپاراتتار شىعاراتىن زاۋىتتىڭ جۇمىسى، «BSL-3» وندىرىستىك تسەحىنىڭ قۇرىلىسى جونىندە دە ەسەپ بەرىلدى.

مەملەكەت باسشىسى باعانى باقىلاۋدا ۇستاۋ، حالىقتىڭ تابىسىن ارتتىرۋ، ينۆەستيتسيا تارتۋ جانە مەملەكەتتىك باعدارلامالاردى ءتيىمدى جۇزەگە اسىرۋ جۇمىستارىن جانداندىرۋ جونىندە ناقتى تاپسىرمالار بەردى. ەسكە سالساق، 7- ساۋىردە جامبىل وبلىسىنىڭ اكىمى لاۋازىمىنا نۇرجان نۇرجىگىتوۆ تاعايىندالدى.

بەردىبەك ساپاربايەۆ جامبىل وبلىسىنىڭ اكىمى لاۋازىمىنان بوساتىلدى.