قازاقستاندا اسكەري كافەدرالاردىڭ جۇمىسىنا قانشا قارجى بولىنەدى

نۇر-سۇلتان. قازاقپارات - قورعانىس مينيسترلىگى اسكەري كافەدرالار جۇمىسىن قامتاماسىز ەتۋگە قانشا قاراجات بولىنەتىندىگىنە قاتىستى مالىمدەمە جاسادى، دەپ حابارلايدى قازاقپارات ءتىلشىسى.

«دايارلىقتى قارجىلاندىرۋ (اسكەري رەزەرۆ) مەملەكەتتىك تاپسىرىس بويىنشا ق ر ءبىلىم جانە عىلىم مينيسترلىگىنە قاراستى 020 بيۋجەتتىك باعدارلاما بويىنشا جانە ق ر دەنساۋلىق ساقتاۋ مينيسترلىگىنە قاراستى 003 بيۋجەتتىك باعدارلاما بويىنشا جۇزەگە اسىرىلادى»، - دەپ جازدى ق ر قورعانىس ءمينيسترى رۋسلان جاقسىلىقوۆ دەپۋتاتتىق ساۋالعا بەرگەن جاۋابىندا.

اتاپ ايتقاندا، جىل سايىن تەگىن نەگىزدە وقيتىن ءبىر ستۋدەنت ءۇشىن ق ر ءبىلىم جانە عىلىم مينيسترلىگىنەن 179800 تەڭگە جانە ق ر دەنساۋلىق ساقتاۋ مينيسترلىگىنەن - 138500 تەڭگە بولىنەدى.

«اسكەري وقىتىلعان رەزەرۆتى جيناقتاۋ اقىلى نەگىزدە وقيتىن ستۋدەنتتەر ەسەبىنەن جۇرگىزىلەدى. بۇل ءوز كەزەگىندە مەملەكەتتىك بيۋدجەتكە تۇسەتىن قوسىمشا جۇكتەمەنى الىپ تاستايدى. ال كورشى ەل رەسەيدىڭ تاجىريبەسىنە سۇيەنسەك، اسكەري رەزەرۆتى دايارلاۋ مەملەكەت ەسەبىنەن تولىق قارجىلاندىرىلادى. ونىڭ ىشىنە اسكەري وقىتىلعان رەزەرۆتى دايارلاۋ ورتالىقتارىنىڭ ينفراقۇرىلىمىن، پروفەسسور-وقىتۋشىلار قۇرامى مەن ءبىلىم الۋشىلار شتاتىن ۇستاۋ (اسكەري كيىم، تاماق جانە اقشالاي قامتاماسىز ەتۋ) كىرەدى»، - دەيدى قورعانىس ءمينيسترى.