قازاقستان مەن گەرمانيا كولىك-لوگيستيكالىق كەشەندى بىرلەسىپ دامىتۋدى جالعاستىرۋعا نيەتتى
بەينەكونفەرەنسياعا قازاقستان مەن گەرمانيانىڭ 100 گە جۋىق مەملەكەتتىك جانە ىسكەر توپ وكىلدەرى قاتىستى.
رومان سكليار ءوز سوزىندە قازاقستان مەن گەرمانيا اراسىنداعى كولىك-لوگيستيكالىق كەشەندى دامىتۋداعى ارىپتەستىكتىڭ ماڭىزدىلىعىن، سونداي-اق ءوزارا ءتيىمدى ىنتىماقتاستىقتى نىعايتۋ جانە دامۋدىڭ جاڭا جولدارىن ىزدەۋ قاجەتتىگىن اتاپ ءوتتى.
گەرمانيا قىتايدان قازاقستان ارقىلى ترانزيتپەن كونتەينەرلىك پويىز جونەلتىلگەن ءبىرىنشى ەۋروپالىق مەملەكەت.
ءوز كەزەگىندە گەرمانيا ەكونوميكاسىنىڭ شىعىس كوميتەتىنىڭ باس اتقارۋشى ديرەكتورى ميحاەل حارمس قازاقستانداعى لوگيستيكا جانە كولىك سالاسىنىڭ دامۋىنا وڭ باعا بەرىپ، كورسەتكىشتەردى ارتتىرۋ بويىنشا جۇمىس قارقىندى جالعاساتىنىنا سەنىم ءبىلدىردى، سونداي-اق قازاقستاندىق سەرىكتەستەرمەن ىنتىماقتاستىقتىڭ سەنىمدىلىگى جانە قول جەتكىزىلگەن بارلىق ۋاعدالاستىقتارعا ادالدىق ءبىلدىردى.
HHLA Hamburger Hafen und Logistik AG (گامبۋرگ پورتى) ديرەكتورى توماس ليۋتە الداعى ۋاقىتتا ءوزارا ءتيىمدى ىنتىماقتاستىقتى دامىتۋدىڭ زور الەۋەتىن اتاپ ءوتىپ، قازاقستاندى نەگىزگى سەرىكتەس دەپ اتادى.
كەزدەسۋدىڭ باسقا قاتىسۋشىلارى دا ەكى ەلدىڭ ستراتەگيالىق ىنتىماقتاستىعى مەن بىرلەسكەن جوبالاردى جۇزەگە اسىرۋدىڭ الداعى پەرسپەكتيۆالارىنا ەرەكشە نازار اۋداردى. جيىن سوڭىندا قازاقستاندىق جانە نەمىس ءىرى لوگيستيكالىق جانە كولىك كومپانيالارىنىڭ وكىلدەرىنىڭ قاتىسۋىمەن «سۇراق-جاۋاپ» فورماتىندا ءداستۇرلى تالقىلاۋ ءوتتى.
