قاسىم-جومارت توقايەۆ بارشا قازاقستان حالقىن ۇلىستىڭ ۇلى كۇنىمەن قۇتتىقتادى

الماتى. قازاقپارات - مەملەكەت باسشىسى قاسىم-جومارت توقايەۆ الماتى قالاسىنىڭ «استانا» الاڭىندا وتەتىن مەرەكەلىك ءىس-شاراعا قاتىسىپ، بارشا قازاقستاندىقتاردى ۇلىستىڭ ۇلى كۇنىمەن قۇتتىقتادى، دەپ حابارلايدى قازاقپارات ءتىلشىسى.

مەملەكەت باسشىسى، بۇل مەيرام ەجەلدەن جاقسىلىق پەن جاسامپازدىقتى دارىپتەيتىن ۇلىق مەرەكە ەكەنىن اتاپ ءوتتى.

«كۇن مەن ءتۇن تەڭەلىپ، كۇللى تابيعات قايتا جاڭاراتىن ءاز ناۋرىزدى قارسى الۋعا بابالارىمىز ەرەكشە ءمان بەرگەن. جىل باسىن - ۇلىستىڭ ۇلى كۇنى دەپ ارداقتاعان. ءاز ناۋرىز - بەرەكە- بىرلىكتىڭ، شىنايى جاناشىرلىقتىڭ جانە ءوزارا قامقورلىقتىڭ مەيرامى. مەن بۇگىن ۇلىس كۇنىن وزدەرىڭىزبەن بىرگە قارسى الۋ ءۇشىن الماتىعا ارنايى كەلىپ وتىرمىن. الماتى - تاۋەلسىزدىگىمىزدىڭ التىن بەسىگى. حالقىمىزعا قايتا ورالعان ۇلىس تويىن مەرەكەلەۋ وسى قاستەرلى مەكەننەن باستالدى. الماتى - قازاق ەلىنىڭ رۋحاني، مادەني جانە ىسكەرلىك ورتالىعى. زيالى قاۋىمنىڭ، ونەر، ءبىلىم، عىلىم، بيزنەس سالاسىنىڭ وكىلدەرى وسىندا شوعىرلانعان»، - دەدى پرەزيدەنت.