رەسەي مەن ۋكراينا قاقتىعىسى «قازاتوم ونەركاسىپتىڭ» قىزمەتىنە اسەر ەتە مە

None
None
نۇر- سۇلتان. قازاقپارات - رەسەي مەن ۋكراينا قاقتىعىسى «قازاتوم ونەركاسىپ» ۇلتتىق كومپانياسىنىڭ قىزمەتىنە ايتارلىقتاي اسەر ەتكەن جوق.

بۇل تۋرالى كومپانيانىڭ باسقارما ءتوراعاسى ءماجيت ءشارىپوۆ مالىمدەدى، دەپ حابارلايدى قازاقپارات ءتىلشىسى.

ونىڭ ايتۋىنشا، كومپانيانىڭ بارلىق كاسىپورىندارى قاۋىپسىزدىكتى قامتاماسىز ەتۋ ءۇشىن دەر كەزىندە قابىلدانعان شارالاردىڭ ارقاسىندا ءۇزىلىسسىز جۇمىس ىستەدى جانە ىستەپ تۇر.

«قازاتوم ونەركاسىپتىڭ رەسەيلىك كومپانيالارمەن بىرلەسكەن كاسىپورىندارى بار، ءبىراق ولارمەن ىنتىماقتاستىقتا قانداي دا ءبىر وزگەرىستەر بولادى دەپ ويلامايمىز. قازاتوم ونەركاسىپ ءونىمىنىڭ ءبىر بولىگىن تاسىمالداۋ رەسەي فەدەراتسياسىنىڭ اۋماعى ارقىلى جۇزەگە اسىرىلادى. قازىرگى ۋاقىتتا تاسىمالداۋ بولىگىندە قانداي دا ءبىر شەكتەۋلەر بايقالعان جوق. الايدا، كومپانيادا بۇرىن ءساتتى پايدالانىلعان بالامالى تاسىمالداۋ مارشرۋتتارى بار ەكەنىن دە ايتقىم كەلەدى»، - دەدى م. ءشارىپوۆ كومپانيانىڭ 2021 -جىلعى جۇمىس قورىتىندىسى تۋرالى باسپا ءسوز ءماسليحاتىندا.

ونىڭ ايتۋىنشا، تەڭگەنىڭ السىرەۋى دە قازاتوم ونەركاسىپتىڭ قارجىلىق جاعدايىنا ايتارلىقتاي اسەر ەتپەيدى، ويتكەنى كومپانيا پايدانى نەگىزىنەن ا ق ش دوللارىمەن الادى. بۇل ايىرباس باعامىنىڭ اۋىتقۋلارىنا بايلانىستى تاۋەكەلدەردەن ساقتايدى.

«ارينە، بولىپ جاتقان جاعدايلار بەلگىسىزدىك تۋدىرادى. ءبىز وقيعالاردىڭ قالاي ءوربيتىنىن جانە بولاشاقتا كومپانيانىڭ قارجىلىق جاعدايىنا نەمەسە وپەراتسيالىق قىزمەتىنە قانداي اسەر ەتەتىنىن بولجاي المايمىز. الايدا ءبىز قازىرگى جاعدايدى ءجىتى قاداعالاپ وتىرامىز جانە تاۋەكەلدەردى ازايتىپ، قىزمەتىمىزدىڭ تۇراقتىلىعى مەن تيىمدىلىگىن قامتاماسىز ەتەتىن شەشىمدەر قابىلداۋعا دايىنبىز»، - دەيدى قازاتوم ونەركاسىپ باسشىسى.

قازاتوم ونەركاسىپ تابيعي ۋران وندىرەتىن الەمدەگى ەڭ ءىرى ۋران ءوندىرۋشى بولىپ سانالادى. توپتىڭ سالاداعى ەڭ ءىرى رەزەرۆتىك ۋران بازاسى بار. قازاتوم ونەركاسىپ ەنشىلەس، باسىبايلى جانە بىرلەسكەن ۇيىمدارمەن بىرگە 14 ۋران ءوندىرۋشى كاسىپورىنعا بىرىكتىرىلگەن 26 كەن ورنىن يگەرۋدە. بارلىق ۋران ءوندىرۋشى كاسىپورىندار قازاقستان رەسپۋبليكاسى اۋماعىندا ورنالاسقان جانە ۋران ءوندىرۋ كەزىندە جەراستى ۇڭعىمالىق شايمالاۋ تەحنولوگياسىن قولدانادى.

قازاتوم ونەركاسىپتىڭ باعالى قاعازدارى لوندون قور بيرجاسىندا، Astana International Exchange بيرجاسىندا جانە قازاقستان قور بيرجاسىندا ورنالاستىرىلعان. قازاتوم ونەركاسىپ قازاقستان رەسپۋبليكاسىنىڭ ۇلتتىق اتوم كومپانياسى جانە توپتىڭ نەگىزگى كليەنتتەرى - اتوم ءوندىرۋشى قۋاتتاردىڭ وپەراتورلارى، ال ونىمدەر ءۇشىن نەگىزگى ەكسپورتتىق نارىقتار - قىتاي، وڭتۇستىك جانە شىعىس ازيا، سولتۇستىك امەريكا جانە ەۋروپا بولىپ وتىر.

اۆتور: ايجان سەرىكجان قىزى

سوڭعى جاڭالىقتار