قاسىم- جومارت توقايەۆ تۇرىكمەنستاننىڭ جاڭا پرەزيدەنتى سەردار بەردىمۇحامەدوۆتى قۇتتىقتادى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ سەردار بەردىمۇحامەدوۆتى پرەزيدەنت سايلاۋىنداعى جەڭىسىمەن قۇتتىقتاپ، تۇرىكمەنستاننىڭ يگىلىگى مەن وركەندەۋى جولىنداعى ونىڭ اسا جاۋاپتى مەملەكەتتىك قىزمەتىنە مول تابىس تىلەدى، دەپ حابارلايدى قازاقپارات اقورداعا سىلتەمە جاساپ.

ەكى ەل حالىقتارىنىڭ اراسىنداعى كوپ عاسىرلىق دوستىققا، تاتۋ كورشىلىك پەن ءوزارا قولداۋعا نەگىزدەلگەن بايلانىستاردى جالعاستىرا وتىرىپ، تاراپتار قازاقستان مەن تۇرىكمەنستاننىڭ ستراتەگيالىق ىنتىماقتاستىعىن ودان ءارى نىعايتۋعا مۇددەلى ەكەنىن راستادى.

قازاقستان پرەزيدەنتى تۇرىكمەنستان باسشىلىعىنىڭ قۋاتتى ءارى وركەندەگەن مەملەكەت قۇرۋ جونىندەگى ستراتەگيالىق باعدارىنىڭ ساباقتاسا جالعاساتىنىنا سەنىم ءبىلدىردى.

قاسىم- جومارت توقايەۆ سەردار بەردىمۇحامەدوۆتى ەلىمىزگە مەملەكەتتىك ساپارمەن كەلۋگە شاقىردى. اڭگىمەلەسۋ بارىسىندا مەملەكەت باسشىسى قاسىم- جومارت توقايەۆ گۋربانگۋلى بەردىمۇحامەدوۆتى دە سايلاۋدىڭ ءساتتى وتۋىمەن قۇتتىقتاپ، داۋىس بەرۋشىلەردىڭ ءىس- شاراعا بەلسەندى قاتىسقانىن ايتتى.