ق ر پرەزيدەنتى جوعارعى سوت ءتوراعاسى جاقىپ اسانوۆتى قابىلدادى

نۇر- سۇلتان. قازاقپارات - ق ر پرەزيدەنتى قاسىم- جومارت توقايەۆ جوعارعى سوت ءتوراعاسى جاقىپ اسانوۆتى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

مەملەكەت باسشىسىنا سوت جۇيەسىنىڭ قازىرگى جاعدايى مەن سوت تورەلىگىنە قاتىستى وزەكتى ماسەلەلەر تۋرالى اقپارات بەرىلدى.

جاقىپ اسانوۆتىڭ ايتۋىنشا، بىلتىر اۋداندىق سوتتار شىعارعان 1,2 ميلليون سوت شەشىمىنىڭ 1,4 پايىزىن نەمەسە 17 مىڭ ءىستى جوعارعى ساتىداعى سوتتار كەرى قايتارعان نەمەسە وزگەرتكەن. قاسىم- جومارت توقايەۆقا 2021 -جىلدىڭ 1 - شىلدەسىنەن باستاپ جۇمىس ىستەي باستاعان اكىمشىلىك سوتتاردىڭ قىزمەتى تۋرالى مالىمەت بەرىلدى. جارتى جىلدا سوتتارعا 14 مىڭ تالاپ ارىز تۇسكەن. مەملەكەتتىك ورگاندار ءاربىر ەكىنشى ىستە ۇتىلعان. بۇرىن قارالعان ىستەردىڭ 85 پايىزى مەملەكەتتىك ورگانداردىڭ پايداسىنا شەشىلەتىن.

پرەزيدەنتكە داۋلاردى شەشۋدىڭ بالامالى تاسىلدەرى تۋرالى باياندالدى. اكىمدىكتەرمەن بىرلەسە وتىرىپ، جەرگىلىكتى جەرلەردە سوتتان تىس مەدياتسيا ورتالىقتارى قۇرىلعان. سوتتار داۋ- دامايلاردىڭ مامىلەگە كەلۋ ارقىلى شەشىلۋىنە كومەكتەسەدى. بۇرىن تاراپتاردىڭ تەك 3 پايىزى عانا تاتۋلاسسا، قازىر بۇل كورسەتكىش 34 پايىزعا جەتكەن.

جوعارعى سوت ءتوراعاسى قىلمىستىق سوت تورەلىگى سالاسىندا دا احۋالدىڭ وزگەرىپ جاتقانىن باياندادى. ونىڭ ايتۋىنشا، سوتتاردا كىنالاۋعا بەيىم تۇرۋ ءىسى تىيىلىپ كەلەدى. سوڭعى 4 جىلدا اۋىر جانە اسا اۋىر قىلمىستار بويىنشا اقتالعاندار سانى 7 ەسە (جىلىنا 20-30-دان 200-گە دەيىن) كوبەيگەن. كەزدەسۋ قورىتىندىسى بويىنشا مەملەكەت باسشىسى سوت ورگاندارىن جاڭعىرتۋ اياسىندا جۇزەگە اسىرىلاتىن ءبىرقاتار مىندەتتى ايقىنداپ بەردى.