سەناتور ۋتيل الىمنان قۇرالعان قارجىنى فەرمەرلەرگە بەرۋدى ۇسىندى
ونىڭ ايتۋىنشا، بيىل ەل اگرارييلەرى ءۇشىن ەرەكشە قيىن جىل بولماق. قۇرعاقشىلىق، مينەرالدى تىڭايتقىشتار مەن پەستيتسيدتەر باعاسىنىڭ ءوسۋى سالاعا تەرىس اسەر ەتپەي قويمايدى. سونىمەن قاتار، رەسەيگە سالىنعان سانكسيالارعا بايلانىستى رەسەيدەن قازاقستانعا ازىق-تۇلىك جەتكىزۋ كولەمى كۇرت ۇلعايۋى مۇمكىن. ءالي بەكتايەۆتىڭ پايىمىنشا، بەيىندى مەملەكەتتىك ورگاندار جۇمىسىنىڭ باياۋلىعى ەلەۋلى پروبلەما تۋدىرىپ وتىر. ولار سۋبسيديالاۋ قاعيدالارىن 2022 -جىلعى 1-شىلدەگە عانا دايىندايدى. ال، ەلدىڭ وڭتۇستىگىندە بۇل ۋاقىتتا جۇمىس «قايناپ» تۇرۋى كەرەك.
«جانارمايعا، مينەرالدى تىڭايتقىشقا، اعىن سۋعا قاتىستى ءتۇيىندى ماسەلەلەردىڭ ءبىر دە بىرەۋى شەشىلگەن جوق. سوعان قاراماي سۋبسيديالاردىڭ كولەمى مەن تۇرلەرى، ولاردى ءبولۋدىڭ ءتارتىبى اياق استىنان وزگەرتىلمەك. اگرارلىق سەكتور - ەكسپەريمەنت جاسايتىن الاڭ ەمەس. كەرىسىنشە، اسىرەسە بيىل اۋىلشارۋاشىلىعىنا قوسىمشا قولداۋ كورسەتۋ قاجەت. مۇمكىن «جاسىل دامۋ» ا ق ەسەپشوتىنداعى ۋتيل الىمنان قۇرالعان 200 ميلليارد تەڭگەدەن استام بوس قالدىقتىڭ ءبىر بولىگىن اگرارلىق سەكتورعا جۇمساعان دۇرىس بولار. قازىرگى تاڭدا حالىقتى اۆتوكولىكپەن ەمەس، ازىق- تۇلىكپەن قامتاماسىز ەتۋ ماڭىزدىراق دەپ ەسەپتەيمىز»، - دەدى ءا. بەكتايەۆ سەناتتىڭ جالپى وتىرىسىندا.
دەپۋتات اۋىل شارۋاشىلىعى وندىرۋشىلەرى ءۇشىن ەڭ قاجەتتى مينەرالدى تىڭايتقىشتار باعاسىنىڭ كۇرت ءوسۋىن دە نازاردان تىس قالدىرمادى. ونىڭ دەرەكتەرى بويىنشا 2021 -جىلعى قاڭتاردا «قازازوت» ا ق وندىرگەن اممياك سەليتراسىنىڭ تونناسى 81 مىڭ تەڭگەنى قۇرادى، جەلتوقساندا ونىڭ قۇنى 200 مىڭ تەڭگەگە دەيىن، ياعني 2,5 ەسەگە قىمباتتاعان. «قازفوسفات» ا ق ءوندىرىسىنىڭ امموفوس باعاسى سول كەزەڭدە ەكى ەسەگە ءوسىپ، 207 مىڭ تەڭگەنى قۇرادى. سەناتور ەلدەگى مينەرالدى تىڭايتقىشتاردىڭ باعاسى مەن ەكسپورتىن رەتتەۋ بويىنشا قاتاڭ شارالار قابىلداۋ قاجەتتىگىن اتاپ ءوتتى. دەپۋتاتتىڭ پىكىرىنشە، قاتاڭ رەتتەۋ سۋعا تاريف بەلگىلەۋ سالاسىندا دا ورىن الۋى ءتيىس.
«سۋ تاپشىلىعىنىڭ بولاتىندىعى جىل باسىنان- اق سەزىلىپ تۇر. وڭتۇستىك وڭىرلەرىندەگى شارۋالار ءۇشىن بيىل ەكونوميكالىق تۇرعىدان دا، الەۋمەتتىك تۇرعىدان دا اۋىر سوعايىن دەپ وتىر. ونىڭ ۇستىنە اعىن سۋعا ءبولىنىپ جۇرگەن سۋبسيديالاردىڭ تاعدىرى تاعى دا بەلگىسىز. سوعان قاراماستان «قازسۋشار» ا ق اعىن سۋدىڭ باعاسىن 2,5 ەسە قىمباتتاتقان. سەبەبى - شەتەلدىك قارجى ۇيىمدارىنان العان زايمداردىڭ تولەۋ ۋاقىتىنىڭ كەلگەندىگى. قازاقستان ۇكىمەتى بيىلدىڭ كليماتتىق ەرەكشەلىكتەرىن، سوڭعى ەكى جىلدىڭ پاندەمياعا قاتىستى اۋىرتپاشىلىقتارىن ەسكەرە وتىرىپ، اۋىل شارۋاشىلىعى تاۋار وندىرۋشىلەرىن سۋمەن قامتاماسىز ەتۋدىڭ، ونىڭ باعاسىن تومەندەتۋدىڭ ناقتى شارالارىن قابىلداۋى قاجەت. كەرەك بولسا، الەمدىك قارجى ينستيتۋتتارىمەن كەلىسسوزدەر جۇرگىزىپ، شەتەلدىك زايمداردىڭ تولەۋ مەرزىمدەرىن قايتا قاراۋدى ۇسىنامىز»، - دەدى دەپۋتات.
