ۇكىمەت حالىقتىڭ تابىسىن ارتتىرۋ باعدارلاماسىن ازىرلەدى

نۇر- سۇلتان. قازاقپارات - حالىقتىڭ ەڭبەك ەتۋدەن تۇسەتىن تابىسىنىڭ ۇلەسى سوڭعى 10 جىلدا 10,8 پايىزدىق تارماققا تومەندەدى. بۇل تۋرالى ۇكىمەت وتىرىسىندا ق ر ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.
None
None

«وسى جىلعى 11-قاڭتاردا مەملەكەت باسشىسى ءماجىلىس وتىرىسىندا سويلەگەن سوزىندە حالىقتىڭ جۇمىسپەن قامتىلۋى مەن تابىسىنىڭ تومەندىگى پروبلەمالارىنا توقتالىپ، حالىقتىڭ تابىسىن ارتتىرۋ باعدارلاماسىن ازىرلەۋدى تاپسىردى. وسى تاپسىرمانى ورىنداۋ ماقساتىندا ۇلتتىق ەكونوميكا مينيسترلىگى مەملەكەتتىك ورگاندارمەن، ۇلتتىق كاسىپكەرلەر پالاتاسىمەن جانە ساراپشىلىق قاۋىمداستىقپەن بىرلەسىپ، كەدەيشىلىك پەن جۇمىسسىزدىق دەڭگەيى بويىنشا ناقتى جاعدايعا تالداۋ جۇرگىزىپ، باعدارلاما جوباسىن ازىرلەدى. تالداۋ ناتيجەلەرى بويىنشا تۇراقتى وڭ ديناميكاعا قاراماستان، سوڭعى ەكى جىلدا حالىقتىڭ ناقتى اقشالاي تابىسىنىڭ ءوسۋ قارقىنى 2019 -جىلعى 6,4 پايىزدان 2021 -جىلى 2,9 پايىزا دەيىن باياۋلاعانى ايقىندالدى»، - دەدى مينيستر.

سونىمەن قاتار ول حالىق تابىسىنىڭ قۇرىلىمىندا ەڭبەك ەتۋدەن تۇسەتىن كىرىستەردىڭ تومەندەۋى جانە الەۋمەتتىك ترانسفەرتتەردەن كىرىستەردىڭ ءوسۋى بايقالاتىندىعىن ايتادى.

«حالىقتىڭ ەڭبەك ەتۋدەن تۇسەتىن تابىسىنىڭ ۇلەسى سوڭعى 10 جىلدا 10,8 پايىزدىق تارماققا تومەندەدى. ءوز كەزەگىندە، الەۋمەتتىك ترانسفەرتتەردىڭ ۇلەسى كەرىسىنشە، 10 پايىزدىق تارماققا ءوستى. جۇرگىزىلگەن تالداۋدى ەسكەرە وتىرىپ، حالىقتىڭ تابىسىن ارتتىرۋ باعدارلاماسىندا مىنا باسىمدىقتار بەلگىلەندى: جۇمىسشى جاستار؛ حالىقتىڭ الەۋمەتتىك وسال توپتارىنىڭ جەكەلەگەن ساناتتارىن جۇمىسقا ورنالاستىرۋ؛ بيۋدجەت جۇمىسكەرلەرىنە لايىقتى جالاقى؛ ەڭبەك كىرىسىندەگى تەڭگەرىمسىزدىكتەردى جويۋ؛ اۋىل شارۋاشىلىعىندا، وڭدەۋ ونەركاسىبىندە ءتيىمدى جۇمىسپەن قامتۋدى دامىتۋدى ىنتالاندىرۋ؛ كاسىپكەرلىك كىرىستىڭ ءوسۋىن ىنتالاندىرۋ؛ تابىستىڭ ساتىپ الۋ قابىلەتىن قورعاۋ»، - دەدى ول.

ءمينيستردىڭ اتاپ وتۋىنشە، ۇكىمەتتىڭ بۇكىل ەكونوميكالىق ساياساتىنىڭ جالپى ماقساتى حالىق تابىسىن ارتتىرۋ بولعاندىقتان، باعدارلاما ۇلتتىق جوبالارمەن ءوزارا بايلانىستى. باعدارلاما اياسىنداعى ءىس- شارالاردى شارتتى تۇردە تىكەلەي جانە جاناما دەپ بولۋگە بولادى. تىكەلەي ءىس- شارالار بيۋدجەت جۇمىسكەرلەرىنىڭ جالاقىسىن كوتەرۋگە جانە كىرىستەردەگى تەڭگەرىمسىزدىكتى تەڭەستىرۋگە، ال جاناما ءىسشارالار حالىقتى جۇمىسپەن قامتۋعا جاردەمدەسۋ، كاسىپتىك دايارلاۋ (قايتا دايارلاۋ) ، وڭدەۋشى كاسىپورىنداردىڭ ونىمدىلىگىن ارتتىرۋ جانە كاسىپكەرلىكتى دامىتۋ ارقىلى تابىستىڭ ءوسۋ مۇمكىندىكتەرىن كەڭەيتۋگە باعىتتالعان.

«باعدارلاما 80 ءىس- شارادان تۇرادى. ولار مىناداي نەگىزگى باعىتتارعا بولىنگەن: حالىقتىڭ ەڭبەك تابىسىنىڭ ارتۋى؛ كەڭ اۋقىمدى جۇمىسپەن قامتۋدى دامىتۋ ارقىلى حالىقتىڭ تابىسىن ارتتىرۋ؛ ساتىپ الۋ قابىلەتىن قورعاۋ»، - دەدى الىبەك قۋانتىروۆ.


سوڭعى جاڭالىقتار