ايەلدەر قاي سالادا جوعارى جەتىستىككە جەتەدى؟
زەرتتەۋ ناتيجەلەرىن بۇگىن ق ر ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Telegram پاراقشاسىندا جاريالادى.
1. عالىمدارىمىزدىڭ جارتىسىنان استامى، ياعني 54 پايىزى ايەلدەر.
2. دوكتورانتۋرادا وقيتىن قىزدار وقۋلارىن كوبىنەسە ديسسەرتاتسيا قورعاۋمەن اياقتايدى. مىسالى، 2020-جىلى ديسسەرتاتسيا قورعاعان تۇلەكتەردىڭ 67,5 پايىزى قىزدار بولدى.
3. ايەل مۇعالىمدەر تۋرالى.
ەكونوميكالىق دامۋ جانە ىنتىماقتاستىق ۇيىمى (ە ى د ۇ) ەلدەرىمەن سالىستىرعاندا قازاقستانداعى ءبىلىم بەرۋ جۇيەسى اناعۇرلىم فەمينيزاتسيالانعان (TALIS-2018) 80 پايىزعا جۋىق.
4. ە ى د ۇ ساراپشىلارىنىڭ ايتۋىنشا، كوپتەگەن ەلدە ايەل مۇعالىمدەر ەر مۇعالىمدەرگە قاراعاندا ماماندىق تاڭداۋدى سانالى تۇردە جاساعان. مىسالى، قازاقستاندىق ايەل مۇعالىمدەردىڭ 76 پايىزى بولاشاق ماماندىقتى تاڭداعان كەزدە پەداگوگ ماماندىعىنا باسىمدىق بەرىلگەنىن ايتقان.
5. سونداي-اق قىزدار وقۋ ساۋاتتىلىعى (27 ۇپايعا) جانە جاراتىلىستانۋ ساۋاتتىلىعى بويىنشا (7 ۇپايعا) ۇلداردان وزىپ شىقتى. سونىمەن بىرگە ۇلدار ماتەماتيكادان مىقتى دەگەن ستەرەوتيپتى «بۇزدى». PISA-2018 ۇلداردىڭ دا، قىزداردىڭ دا ءبىلىمى ءبىر دەڭگەيدە ەكەنىن كورسەتتى.
6. باسقا زەرتتەۋلەردىڭ (TIMSS-2019، IEA) ناتيجەلەرى دە 4 جانە 8-سىنىپ قىزدارىنىڭ ۇلدارعا قاراعاندا وڭ ناتيجەلەرگە قول جەتكىزەتىنىن كورسەتتى. نەمەسە كەمىندە ماتەماتيكا مەن عىلىمدا بىردەي جەتىستىكتەردى كورسەتەدى.
7. قىزداردىڭ باسىم كوپشىلىگى (68 پايىزدان استامى) كەلەسى ماماندىقتار بويىنشا جوعارى ءبىلىم الادى:
1. الەۋمەتتىك عىلىمدار، جۋرناليستيكا جانە اقپارات - 79,1 پايىز؛
2.ونەر جانە گۋمانيتارلىق عىلىمدار - 71 پايىز؛
3. پەداگوگيكالىق عىلىمدار - 70 پايىز؛
4. جاراتىلىس تانۋ، ماتەماتيكا جانە ستاتيستيكا - 68 پايىز.
ءبىلىم بەرۋ باعدارلامالارىنىڭ توپتارى بويىنشا گەندەرلىك تەڭدىك بەلگىلەندى:
1. اۋىل شارۋاشىلىعى جانە بيورەسۋرستار - 49,5 پايىز؛
2. بيزنەس، مەنەدجمەنت جانە قۇقىق - 48 پايىز.
ال قىزدار كوپ بارمايتىن سالالار مىنالار:
1. تەحنيكالىق عىلىمدار مەن تەحنولوگيالار - 31,6 پايىز؛
2. اكت - 30 پايىز؛
3. ينجەنەرلىك، وڭدەۋ ونەركاسىبى جانە قۇرىلىس سالالارى - 28,7 پايىز.
