ءاليحان سمايىلوۆ تۇرىك ينۆەستورلارىنا ءتيىمدى بولاتىن سالالاردى اتادى

«ۇكىمەت ەلدىڭ ينۆەستيتسيالىق تارتىمدىلىعىن جاقسارتۋ بويىنشا بەلسەندى جۇمىس جۇرگىزۋدە. ءبىز ءوزىمىزدىڭ ينۆەستيتسيالىق ساياساتىمىزعا ايتارلىقتاي وزگەرىستەر ەنگىزدىك. جاھاندىق ەنەرگەتيكالىق جانە تەحنولوگيالىق تالاپتاردى كۇشەيتۋ جاعدايىندا جاڭا ينۆەستيتسيالىق ساياسات تۇجىرىمداسى جوباسىن ازىرلەدىك. جاڭا وزگەرىستەر ەكونوميكانىڭ باسىم سالالارىندا ينۆەستورلار ءۇشىن سالىقتىق جۇيەنى وڭتايلاندىرۋ جانە جەڭىلدەتۋ، سۋبسيديادار جانە باسقا دا ءىس-شارالاردى قامتيدى. جاڭا تاسىلدەرگە سايكەس، ءبىز مەملەكەتتىك رەتتەۋدى ازايتۋ جانە جەكەشەلەندىرۋدى جىلدامداتۋ بويىنشا ءتيىستى قادامدار قابىلداپ جاتىرمىز. بۇل ءوز كەزەگىندە ەڭبەك ونىمدىلىگىن ارتتىرىپ، جەكە سەكتوردىڭ جۇمىس ىستەۋىنە جول اشادى»، - دەدى ءا. سمايىلوۆ «Rixos President Astana» قوناق ۇيىندە قازاقستان-تۇركيا بيزنەس-فورۋمىندا.

ۇكىمەت باسشىنىڭ ايتۋىنشا، ينۆەستورلارعا مەملەكەتتىك قولداۋدىڭ ءتۇرلى شارالارى، سالىقتىق جەڭىلدىكتەر، كەدەندىك باجداردان بوساتۋ، زاتتاي گرانتتار بەرۋ تۇرىندەگى پرەفەرەنتسيالار ۇسىنىلادى.

وسى ءساتتى پايدالانا وتىرىپ، ءا. سمايىلوۆ تۇرىك سەرىكتەستەردىڭ نازارىنا بىرنەشە باعىتتى ۇسىندى.

«ءبىرىنشى، مەتاللۋرگيا جانە تاۋ-كەن ءوندىرۋ سالاسى ءبىزدىڭ ەكونوميكامىزدىڭ باستى سەكتورى بولىپ سانالادى. وندا ونەركاسىپ پەن ۇلتتىق ەكسپورتتىڭ شامامەن 20 پروتسەنتى شوعىرلانعان. تابيعي رەسۋرستار قورى بويىنشا قازاقستان الەمدە التىنشى ورىندا، مينەرالدى شيكىزاتتى ءوندىرۋدىڭ جالپى كولەمى بويىنشا 10-ورىندا. قازىر يگەرىلمەي جاتقان كەن ورىندارىنا تەكسەرۋ جۇرگىزىلۋدە. بوسايتىن كەن ورىندارى جاڭا ينۆەستورعا بەرۋ ءۇشىن اۋكتسيونعا شىعارىلادى.

بۇل سالانىڭ دامۋىنا جاڭادان قابىلدانعان «جەر قويناۋى تۋرالى جانە جەر قويناۋىن پايدالانۋ تۋرالى» كودەكس قوسىمشا ىقپال ەتەدى. ول ءبىزدىڭ جەر قويناۋىمىزدىڭ قورىن ودان ءارى زەرتتەۋ ءۇىشن ءبىرقاتار جەڭىلدىكتەر بەرۋدى قاراستىرىلادى. جاڭا كودەكس قابىلدانعان ساتتەن باستاپ، ءۇش جىلدا جەر قويناۋىن پايدالانۋعا بەرگەن ليتسەنزيالار سانى 1600 دەن استىپ، سۇرانىستىڭ ايرىقشا ارتقانىن كورسەتتى. تۇرىك بيزنەسىن وسى باعىتتا بىرلەسىپ، بەلسەندى جۇمىس ىستەۋگە شاقىرامىن»، - دەدى ءاليحان سمايىلوۆ.

ەكىنشىدەن، پرەمەر-مينيستر ماشينا جاساۋ سالاسى - قازاقستاننىڭ ەكونوميكالىق ءوسۋ درايۆەرلەرىنىڭ ءبىرى ەكەنىن جەتكىزدى.

«بۇل سالاعا ءىرى شەتەلدىك كومپنيالار دا بەلسەندى اتسالىسۋدا. ماشينا جاساۋ ونىمدەرىنىڭ ەكسپورتى ءوسىپ، يمپورت كولەمى بىرتىندەپ ازايۋدا. اتالعان سەكتوردىڭ دامۋى ءۇشىن تۇرىك كومپانيالارىن وسى سالادا جوبالاردى جۇزەگە اسىرۋعا شاقىرامىز. ويتكەنى بۇل سالادا جاقسى شيكىزات بازاسى بار، سونداي-اق ەكسپورتتىق الەۋەتى دە وتە جوعارى. ءۇشىنشى، اگروونەركاسىپ كەشەنى - قازاقستان ءۇشىن ستراتەگيالىق باعىتتاردىڭ ءبىرى ءارى تۇرىك كومپانيالارى ءۇشىن زور الەۋەتكە يە. قازاقستانداعى اۋىل شارۋاشىلىعى القاپتارى 200 ميلليون گەكتاردان اسادى، ال جايىلىمدار - 180 ميلليون گەكتارعا جۋىق. ب ۇ ۇ ازىق-تۇلىك جانە اۋىلشارۋاشىلىق ۇيىمى قازاقستاندى الەمدەگى ەڭ پەرسپەكتيۆالى اۋىل شارۋاشىلىعى ونىمدەرىن وندىرەتىن بەس ەلدىڭ ءبىرى رەتىندە ءارى جاھاندىق ءارى ايماقتىق ازىق-تۇلىك قاۋىپسىزدىگىن قامتاماسىز ەتۋدەگى ماڭىزدى ويىنشى رەتىندە تانىدى. اگرارلىق سالاداعى ءوزارا ءتيىمدى ىنتىماقتاستىقتىڭ الەۋەتى شىنىمەن ۇلكەن»، - دەدى ءا. سمايىلوۆ.

تورتىنشىدەن، قازاقستان 2030-جىلعا قاراي جاڭارتىلاتىن ەنەرگيا كوزدەرى ۇلەسىن 15 پروتسەنتكە دەيىن ۇلعايتۋعا جانە 2060-جىلعا قاراي كومىرتەكتى بەيتاراپتىققا جەتۋگە نيەتتى.

قازاقستان ەنەرگەتيكا سالاسىنداعى جوبالاردى جۇزەگە اسىرۋ ءۇشىن جوعارى دارەجەدەگى تاجىريبەلى تۇرىك كومپانيالارىنىڭ قاتىسۋىنا مۇددەلى. ۇكىمەت ءوز تاراپىنان جاڭارىتلاتىن ەنەرگيا سالاسىنداعى جوبالاردى ءساتتى جاساۋ ءۇشىن قاجەتتى ءبىرقاتار قولداۋ شارالارىن ۇسىنۋعا دايىن.

«بەسىنشى، استانا حالىقارالىق قارجى ورتالىعى قارجى سەكتورىنداعى ىنتىماقتاستىقتىڭ ءوزارا ءتيىمدى پەرسپەكتيۆالارىن ۇسىنادى. وعان قاتىسۋشىلارعا 50 جىلعا دەيىن سالىق جەڭىلدىكتەرى، جەڭىلدەتىلگەن ۆاليۋتالىق، ۆيزالىق جانە ەڭبەك رەجيمدەرى قاراستىرىلعان. اعىلشىن قۇقىقىعىنا نەگىزدەلگەن تاۋەلسىز سوت جانە حالىقارالىق تورەلىك ورتالىعى ادىلدىككە جانە ينۆەستورلاردىڭ قۇقىقتارىن قورعاۋعا كەپىلدىك بەرەدى. قازىرگى ۋاقىتتا ورتالىقتا 17 تۇرىك كومپانياسى تىركەلگەن، قاتىسۋلارىڭىزدى ودان ءارى كەڭەيتۋگە شاقىرامىز»، - دەدى ءاليحان سمايىلوۆ.

ايتا كەتەيىك، ەلوردادا تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي مىرزانىڭ قازاقستان رەسپۋبليكاسىنا ساپارى شەڭبەرىندە قازاقستان-تۇركيا بيزنەس-فورۋمى ءوتىپ جاتىر. قازاقستان مەن تۇركيا 68 تارماقتان تۇراتىن بىرلەسكەن ءىس-قيمىل جوسپارىن قابىلدادى. وندا ساۋدا، ونەركاسىپ، ينۆەستيتسيا، كولىك پەن ترانزيت جانە تاعى باسقا سالالار قامتىلعان.

پاندەمياعا قاراماستان ءۇشىنشى جىل قاتارىنان قازاقستانعا تۇركيادان رەكوردىق كولەمدە ينۆەستيتسيالار سالىپ كەلەدى.