بۇگىن - العىس ايتۋ كۇنى

نۇر- سۇلتان. قازاقپارات - بۇگىن ەلىمىزدە العىس ايتۋ كۇنى اتاپ وتىلەدى، دەپ حابارلايدى قازاقپارات ءتىلشىسى.

2016 -جىلدىڭ 14-قاڭتاردان باستاپ 1-ناۋرىز - ەلىمىزدە العىس ايتۋ كۇنى دەپ جاريالانعان. ءدال وسى كۇنى ەلىمىزدە قازاقستان حالقى اسسامبلەياسى قۇرىلدى. العىس ايتۋ كۇنى - بەيبىتشىلىك پەن دوستىققا، تىنىشتىق پەن ىنتىماققا ۇندەيتىن مەرەكە.

بۇل كەڭ قۇشاق قۇرمەت - ەلىمىزدەگى ءتۇرلى ۇلت وكىلدەرىنىڭ اراسىنداعى ادامگەرشىلىك قارىم- قاتىناستىڭ ونەگەلى ولشەمىنە، حالقىمىز ءۇشىن ايتۋلى ىزگى داستۇرگە اينالدى. جالپى، بۇل كۇن قيىن- قىستاۋ كەزەڭدەردە قۋانىش پەن قايعىنى قاتار ءبولىسىپ، پانا بولا بىلگەن قازاق حالقىنا وزگە ۇلت وكىلدەرىنىڭ العىس ايتاتىن ءساتى. دەگەنمەن، سوڭعى 2 جىلدىڭ كولەمىندە جەر شارىن شارپىعان كوروناۆيرۋس پاندەمياسى كەزىندە كۇنى- ءتۇنى تىكەسىنەن تۇرىپ، ناۋقاستاردى قابىلداعان ەلىمىزدىڭ مەديتسينا قىزمەتكەرلەرىنە زور العىس بىلدىرگەنىمىز ورىندى بولار. ويتكەنى، دارىگەرلەر كوروناۆيرۋس تاراعان العاشقى ساتتەن- اق پاندەميامەن كۇرەستە الدىڭعى شەپتە ءجۇردى. ولاردىڭ جانيقيارلىق ەڭبەگىنە مەملەكەت باسشىسى قاسىم- جومارت توقايەۆ تا ءادىل باعاسىن بەرگەن ەدى.

«بۇگىندە بۇكىل ەلىمىز دارىگەرلەر مەن مەديتسينا قىزمەتكەرلەرىنىڭ قايسارلىعىنا ءتانتى بولۋدا. ولار - ادام ومىرىنە اراشا ءتۇسىپ جاتقان بۇگىنگى كۇننىڭ باتىرلارى»، - دەپ باعالاعان بولاتىن قازاقستان پرەزيدەنتى.

مەملەكەت تە مەديتسينا قىزمەتكەرلەرىنە قولداۋ كورسەتۋدەن تىس قالعان جوق. ىندەتپەن كۇرەسكە جۇمىلدىرىلعان مەديتسينا قىزمەتكەرلەرىنىڭ ەڭبەگىنە قوماقتى ۇستەمەاقى قوسىپ، جالاقىلارىن كوتەردى. ولاردىڭ جالاقىلارىن كوتەرۋ الداعى ۋاقىتتا دا جالعاسىن تابادى. بۇل سالاداعى عالىمدارىمىز، عىلىمي قىزمەتكەرلەرىمىز دە پاندەميامەن كۇرەستەن تىس قالعان جوق.

بيولوگيالىق قاۋىپسىزدىك پروبلەمالارىنىڭ عىلىمي- زەرتتەۋ ينستيتۋتى عالىمدارىنىڭ ارقاسىندا COVID-19-عا قارسى ءوز ۆاكسيناسىن جاساپ شىعارعان ساناۋلى ەلدىڭ قاتارىنا قوسىلدىق. قازىرگى ۋاقىتتا وتاندىق عالىمدار ازىرلەگەن QazVac ۆاكسيناسى ۆانكتسيناتسيا جانە ريەۆاكتسيناتسيا كەزىندە قولدانىلىپ، ەل تۇرعىندارىنىڭ ۆيرۋسقا قارسى يممۋنيتەتىنىڭ جوعارى بولۋىنا سەپتىگىن تيگىزىپ ءجۇر. اتالعان ۆاكسينانى ازىرلەگەن عالىمدارىمىز مەملەكەتتىك سىيلىققا دا يە بولدى.

پاندەميا ورشىگەن كەزدە اسكەري قىزمەتشىلەرىمىز دە، پوليتسيا قىزمەتكەرلەرى دە ايانباي ەڭبەك ەتتى. ولاردىڭ دا ەڭبەگى ولشەۋسىز. ۇرپاق تاربيەسى - ۇلتتىڭ بولاشاعى، ۇرپاعىمىزدىڭ ۇلاعاتتى بولۋى ۇستازعا بايلانىستى ەكەنىن دە ىندەت جەتە ءتۇسىندىردى. وسىناۋ قيىن كەزەڭدەردە ۇستازدار جەدەل ارادا قازىرگى زامان تەحنولوگيالارىنا بەيىمدەلىپ، شاكىرتتەرىنە ونلاين رەجيمدە ساباق بەرۋدى ۇيرەندى.

«ايشىلىق الىس جەرلەردەن، كوزدى اشىپ، جۇمعانشا جەدەل حابار الدىراتىن» تەحنولوگيانىڭ ارقاسىندا بولاشاق بۋىننىڭ بويىنشا ءبىلىم ءنارىن ءسىڭىردى. قيىندىقتارعا مويىمادى، مويۇنسىنبادى. جاس بۋىن بويىنا ءبىلىم ءنارىن ءسىڭىرۋ جولىنداعى جۇمىستارىن ابىرويمەن اتقارا ءبىلدى. سوندىقتان 1-ناۋرىز كۇنى بارشا ۇستاز قاۋىمىنا دا العىس ايتۋ ارتىق ەتپەيدى.