ازاماتتارىمىزدى ۋكراينادان الىپ كەلۋ ماسەلەسى پرەزيدەنتتىڭ جەكە باقىلاۋىندا-بەرىك ءۋالي
بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي ءمالىم ەتتى، دەپ حابارلايدى قازاقپارات.
«بۇگىن قازاقستاننىڭ ۋكرايناداعى ەلشىسى دارحان كالەتايەۆ مەملەكەت باسشىسى قاسىم-جومارت توقايەۆقا ازاماتتارىمىزدى ەلگە جەتكىزۋ ءۇشىن قابىلدانعان شارالار جونىندە ەسەپ بەردى. جالپى مەملەكەت باسشىسى سىرتقى ىستەر مينيسترلىگىنىڭ، ەلشىلىكتەر قىزمەتكەرلەرىنىڭ جانە قازاقستاننىڭ ۋكراينا مەن پولشاداعى قۇرمەتتى كونسۋلدارىنىڭ ءتۇرلى قيىندىقتارعا قاراماي، اتقارىپ جاتقان جۇمىستارىن وڭ باعالايدى»، - دەپ جازدى ب. ءۋالي Facebook-تە.
ونىڭ ايتۋىنشا، قازىرگى ۋاقىتتا ق ر ۇكىمەتى كاتوۆيتسە (پولشا) - اتىراۋ - الماتى باعىتى بويىنشا رەپاترياتسيالىق رەيستەردى ۇيىمداستىرۋ ماسەلەسىن پىسىقتادى.
قازاقستان ازاماتتارىن ەلگە جەتكىزەتىن ءبىرىنشى رەيس بۇگىنگە جوسپارلانعان.
«ازاماتتارىمىزدى ۋكراينادان الىپ كەلۋگە قاتىستى ماسەلە پرەزيدەنت قاسىم-جومارت توقايەۆتىڭ جەكە باقىلاۋىندا»، - دەدى مەملەكەت باسشىسىنىڭ باسپا ءسوز حاتشىسى.
