تەڭگەلىك سالىمداردى قورعاۋ باعدارلاماسى قانداي دەپوزيتتەرگە قاتىستى - ق ر ۇلتتىق بانكى

نۇر-سۇلتان. قازاقپارات - ۇلتتىق بانك تەڭگەلىك سالىمداردى قورعاۋ باعدارلاماسى قانداي دەپوزيتتەرگە قاتىستى قولدانىلاتىندىعىن ءتۇسىندىردى، دەپ حابارلايدى قازاقپارات ق ر ۇلتتىق بانكىنىڭ باسپا ءسوز قىزمەتىنە سىلتەمە جاساپ.

ۇكىمەت پەن ۇلتتىق بانك جاريالاعان تەڭگەلىك سالىمداردى قورعاۋ باعدارلاماسىنىڭ قانداي دەپوزيتتەرگە قولدانىلاتىندىعى تۋرالى ۇلتتىق بانككە كوپتەگەن ساۋالدار كەلىپ تۇسۋدە. جانە بۇل باعدارلاماعا ەنگىزىلمەگەن، تالاپ ەتىلگەنگە دەيىنگى دەپوزيتتەرگە تۇرعىندار اراسىندا كەڭ تارالعان اقشانى تولىقتىرۋ جانە الۋ قۇقىعىمەن بەلگىلى ءبىر كەزەڭگە اشىلاتىن دەپوزيتتەر جاتقىزىلا ما؟

ۇكىمەت پەن ۇلتتىق بانكتىڭ بىرلەسكەن مالىمدەمەسىندە باعدارلاما اعىمداعى جانە كارتوچكالىق شوتتارعا، سونداي-اق، تالاپ ەتىلگەنگە دەيىنگى دەپوزيتتەر مەن شارتتى دەپوزيتتەرگە قولدانىلمايدى دەلىنگەن.

تالاپ ەتىلگەنگە دەيىنگى دەپوزيتتەردە مەرزىمىنەن بۇرىن الۋ قۇقىعىمەن قاتار دەپوزيتتەردىڭ وسى تۇرىنە عانا جاتاتىن ءبىرقاتار بەلگىلەر بار.

بىرىنشىدەن، ولار بويىنشا سىياقى مولشەرلەمەسى %0,1 دەڭگەيىندە شەكتەلگەن.

ەكىنشىدەن، ونىڭ مەرزىمى شەكتەلمەگەن، ياعني كەلىسىمشارتتىڭ بەلگىلى ءبىر مەرزىمى جوق. بۇل دەپوزيتتەر قازاقستاندىق بانك جۇيەسىندە كەڭ تارالماعان - ولاردىڭ ۇلەسى جەكە تۇلعالاردىڭ تەڭگەلىك سالىمدارىنىڭ شامامەن 0,1%- ىن قۇرايدى.

باعدارلاماعا قازاقستاندىق ەكىنشى دەڭگەيدەگى بانكتەردىڭ بارلىعىندا پايىزدىق مولشەرلەمە بويىنشا قولجەتىمدى، سونداي-اق مەرزىمىنەن بۇرىن الۋ مۇمكىندىگى قاراستىرىلعان، كەڭ تارالعان مەرزىمسىز، مەرزىمدى تەڭگەدەگى دەپوزيتتەر قاتىسا الادى.

بۇدان باسقا، باعدارلاماعا تەڭگەدەگى جيناق دەپوزيتتەرى، «وتباسى بانك» ا ق- داعى تۇرعىن ءۇي قۇرىلىس جيناق دەپوزيتتەرى، سونداي-اق مەملەكەتتىك ءبىلىم بەرۋ جيناقتاۋ جۇيەسى اياسىندا ەكىنشى دەڭگەيدەگى بانكتەردەن اشىلعان سالىمدار قاتىسا الادى.

بۇل دەپوزيتتەردىڭ بارلىعى 2022-جىلعى 23- اقپان كۇنىنىڭ سوڭىنداعى جاعداي بويىنشا سالىمدارعا كەپىلدىك بەرۋ جۇيەسىنە قاتىسۋشى - ءبىر نەمەسە بىرنەشە ەكىنشى دەڭگەيدەگى بانكتە جانە «وتباسى بانك» اكسيونەرلىك قوعامىندا اشىلعان بولۋى ءتيىس.

جاقىن ۋاقىتتا ۇكىمەت پەن ۇلتتىق بانكتىڭ بيۋجەت قاراجاتى ەسەبىنەن جەكە تۇلعالاردىڭ دەپوزيتتەرى بويىنشا وتەماقى (سىياقى) ەسەپتەۋدى رەگلامەنتتەيتىن ءتيىستى اكتىلەردى قابىلدايدى.