قاسىم- جومارت توقايەۆ جاڭادان تاعايىندالعان ىشكى ىستەر ءمينيسترىن تانىستىردى
جيىندا قاسىم- جومارت توقايەۆ ەرلان تۇرعىمبايەۆتى ىشكى ىستەر ءمينيسترى قىزمەتىنەن بوساتۋ جانە مارات احمەتجانوۆتى ۆەدومستۆو باسشىلىعىنا تاعايىنداۋ تۋرالى جارلىقتارعا قول قويعانىن حابارلادى. پرەزيدەنت قاڭتار وقيعاسى كەزىندە ارانداتۋشىلار مەن راديكالدى كۇشتەردىڭ سوققىسىنا ءبىرىنشى بولىپ ىشكى ىستەر ورگاندارىنىڭ قىزمەتكەرلەرى كەۋدەسىن توسقانىن اتاپ ءوتتى.
ونىڭ ايتۋىنشا، كوپتەگەن قىزمەتكەر ءوزىنىڭ مىندەتىنە ادال بولىپ، قۇقىقتىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ كەزىندە تاباندىلىق پەن باتىلدىقتىڭ ۇلگىسىن كورسەتتى. بۇدان بولەك پرەزيدەنت تەرگەپ- تەكسەرۋ جۇمىستارى بارىسىندا زاڭدىلىقتى قامتاماسىز ەتىپ، ازاماتتاردىڭ قۇقىعىن ساقتاۋ قاجەت ەكەنىنە ەرەكشە نازار اۋداردى.
- وسى قايعىلى جاعداي ىشكى ىستەر ورگاندارى جۇيەسىندە كەمشىلىكتەردىڭ كوپ ەكەنىن كورسەتتى. ونى اشىق ايتۋ كەرەك. وتكەن ىستەن بارىنشا ساباق الىپ، مۇنداي وقيعاعا جول بەرمەۋ ءۇشىن بارلىق ولقىلىقتاردى انىقتاپ، جويۋ كەرەك. سونداي- اق قىلمىسكەرلەر مەن ارانداتۋشىلاردىڭ ءبارىن تاۋىپ، زاڭعا سايكەس جاۋاپقا تارتۋ قاجەت. ءبىراق رۇقسات ەتىلمەگەن تەرگەپ- تەكسەرۋ ادىستەرىنە مۇلدە جول بەرمەۋ كەرەك، - دەدى مەملەكەت باسشىسى.
قاسىم- جومارت توقايەۆتىڭ پىكىرىنشە، ىشكى ىستەر ورگاندارى قۇقىقتىق ءتارتىپ پەن ازماتتارىمىزدىڭ قاۋىپسىزدىگىن قامتاماسىز ەتۋدىڭ كەپىلى بولۋعا ءتيىس. مەملەكەت باسشىسى جاڭا مينيسترگە ازاماتتاردىڭ قۇقىقتارىن قورعاۋ دەڭگەيىن ارتتىرۋعا جانە زاڭدى مۇددەلەرىن ساقتاۋعا، حالىقتىڭ پوليتسياعا دەگەن سەنىمىن نىعايتۋعا تاپسىرما بەردى. سونداي- اق ىشكى ىستەر ورگاندارىن رەفورمالاۋ، سونىڭ ىشىندە پوليتسيا قىزمەتىنە سەرۆيستىك مودەل ەنگىزۋ، قىزمەتكەرلەردى ىرىكتەۋدىڭ ساپاسى مەن دايىندىعىن كۇشەيتۋ جۇمىستارىن جالعاستىرۋ قاجەت ەكەنىن ايتتى.
