داريعا نازاربايەۆانىڭ دەپۋتاتتىق وكىلەتتىگىن توقتاتۋ جونىندە ۇسىنىم بەردى

نۇر- سۇلتان. قازاقپارات - ورتالىق سايلاۋ كوميسسياسى ءماجىلىس دەپۋتاتى داريعا نازاربايەۆانىڭ وكىلەتتىگىن توقتاتۋ جونىندە قاۋلى شىعاردى، دەپ حابارلايدى قازاقپارات.

بۇل جايىندا كوميسسيانىڭ رەسمي سايتىندا جاريالانعان قۇجاتتان بەلگىلى بولدى.

«قازاقستان رەسپۋبليكاسى پارلامەنتى ءماجىلىسىنىڭ دەپۋتاتى د. ن. نازاربايەۆانىڭ وكىلەتتىگىن توقتاتۋعا اكەلەتىن نەگىزدىڭ تۋىنداعانى تۋرالى قازاقستان رەسپۋبليكاسى كونستيتۋتسياسىنىڭ 52-بابىنا، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» 1995 -جىلعى 16 - قازانداعى قازاقستان رەسپۋبليكاسى كونستيتۋتسيالىق زاڭىنىڭ 24-بابى 3 جانە 8-تارماقتارىنا سايكەس قازاقستان رەسپۋبليكاسىنىڭ ورتالىق سايلاۋ كوميسسياسى قاۋلى ەتەدى:

1. قازاقستان رەسپۋبليكاسى پارلامەنتى ءماجىلىسىنىڭ دەپۋتاتى داريعا نۇرسۇلتان قىزى نازاربايەۆانىڭ ءوتىنىش بەرۋىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋعا اكەلەتىن نەگىز تۋىندادى دەپ بەلگىلەنسىن.

2. قازاقستان رەسپۋبليكاسى پارلامەنتى ءماجىلىسىنىڭ دەپۋتاتى د. ن. نازاربايەۆانىڭ وكىلەتتىگىن مەرزىمىنەن بۇرىن توقتاتۋ تۋرالى ۇسىنىم قازاقستان رەسپۋبليكاسى پارلامەنتىنىڭ ماجىلىسىنە ەنگىزىلسىن» دەلىنگەن قۇجاتتا.