قىتايمەن ساۋدا-ساتتىق تولىققاندى ءارى ساپالى كەدەندىك راسىمدەلۋى ءتيىس - ق ر پرەمەر-ءمينيسترى
بۇل تۋرالى ەۋرازيالىق ۇكىمەتارالىق كەڭەستىڭ كەڭەيتىلگەن وتىرىسىندا ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«ءبىز سىرتقى جانە ءوزارا ساۋدا- ساتتىق ستاتيستيكالارىن تەڭەستىرۋ ءارى سىرتقى ساۋدا اعىندارىنىڭ اشىقتىعى قاجەت ەكەندىگى جايىندا ءجيى ايتامىز. سۇر يمپورت ىشكى وندىرۋشىلەرگە، زاڭدى يمپورتتاۋشىلارعا ايتارلىقتاي زيانىن تيگىزەدى، مەملەكەتتەرىمىزدىڭ بيۋدجەتىنە تەرىس اسەر ەتەدى. قازىرگى ۋاقىتتا قازاقستان قىتايمەن شەكاراداعى كەدەندىك باقىلاۋ ءىس-شارالارىن ايتارلىقتاي كۇشەيتتى. ەكى ايعا تولمايتىن ۋاقىتتىڭ ىشىندە قابىلدانعان ءىس-شارالار تاۋارلاردىڭ راسىمدەلۋىنىڭ جانە كەدەندىك تولەمدەردىڭ ارتۋىنا الىپ كەلدى. دەگەنمەن، قىتايدان يمپورتتىڭ كورشى ەلدەرگە ايتارلىقتاي وسكەنىن بايقاپ وتىرمىز»، - دەدى ءاليحان سمايىلوۆ.
ۇكىمەت باسشىسىنىڭ اتاپ وتۋىنشە، ودان كەيىن اتالعان يمپورت لايىقتى كەدەندىك تازارتۋسىز جانە سالىق تولەمدەرىن تولەمەستەن ە ا ە و-نىڭ ورتاق نارىعىنا تۇسەدى.
«بۇل رەتتە «جالعىز كىسى جاۋ الماس» دەگەن ماقال ورىن العان جاعدايدى سيپاتتاۋعا ءدال كەلەدى. سىرتقى ساۋدا-ساتتىقتى، ءبىرىنشى كەزەكتە قىتايمەن ساۋدانى تولىققاندى ءارى ساپالى كەدەندىك راسىمدەۋگە بىرلەسە كۇش سالۋىمىز قاجەت. بارلىق پروتسەستەردى جانە مالىمەتتەر الماسۋدى دەرەۋ سيفرلاندىرۋ كەرەك. بۇل ادال باسەكەلەستىكتى دامىتۋ جانە سالىقتار مەن كەدەندىك باج سالىعى ەسەبىنەن بيۋدجەتكە تۇسىمدەردى ارتتىرۋ ءۇشىن سەرپىن بەرەدى. مۇنداي جۇمىستى كوميسسيانىڭ بەلسەندى ۇيلەستىرۋىمەن جۇرگىزۋ قاجەت. كەلىسسوزدەر الاڭىن قۇرعاننان ءىس بىتپەيدى. ناقتى قادامدار قابىلدايتىن جانە كوپتەگەن ساعاتقا سوزىلاتىن جينالىستاردان باس تارتاتىن ۋاقىت كەلدى»، - دەدى قازاقستان پرەمەر-ءمينيسترى.
اۆتور: مارلان جيەمباي
