ساراپشىلار ۋتيليزاتسيا الىمىنىڭ قىسقارۋىنا قاتىستى پىكىر ءبىلدىردى
الماتىدا وتكەن ارنايى باسپا ءسوز ءماسليحاتىندا «استانا موتورس» باس ديرەكتورى بەكنۇر نەسىپبايەۆ ۋتيل الىمىنىڭ تومەندەۋى سىرتتان يمپورتتالاتىن كولىك باعاسىنىڭ از دا بولسا ارزانداۋىنا ىقپال ەتەتىنىن ايتتى. ال وزىمىزدە قۇراستىرىلاتىن كولىكتەرگە ونىڭ قاتىسى جوق.
«ەگەر ۋتيل الىم تومەندەسە BMW، MINY ، Subaru، Haval، Chery كولىگىنىڭ باعاسى ارزانداۋى كەرەك. بۇل ۋتيل الىم 50 پايىزعا تۇسكەن كۇنى ىسكە اسىرىلادى. الايدا دوللار كۋرسىن ەسكەرگەنىمىز ءجون، تەڭگەنىڭ قۇلدىراۋى، لوگيستيكا ءبارى كولىك باعاسىنىڭ وسۋىنە اكەلەدى. ياعني قازىرگى كولىك باعاسى الداعى ۋاقىتتا دا ساقتالادى دەپ ايتا المايمىز»، - دەدى ول.
ونىڭ ايتۋىنشا، ۋتيليزاتسيالىق الىم Hyundai Trans Kazakhstan زاۋىتىندا شىعارىلاتىن Hyundai جەڭىل اۆتوكولىكتەرىنىڭ، سونداي-اق Hyundai ترانس الماتى زاۋىتىندا وندىرىلەتىن Hyundai، ماز كوممەرتسيالىق كولىكتەرى مەن Golden Dragon جولاۋشىلار كولىكتەرىنىڭ قۇنىنا اسەر ەتپەيدى، ويتكەنى تۇتىنۋشىلار ول ءۇشىن ۋتيل الىم تولەمەيدى.
«ايتا كەتسەك، ءبىزدىڭ حۋنداي ترانس قازاقستان زاۋىتىنا روپ بۇعان دەيىن ءبىز تولەگەن 29,2 ميلليارد تەڭگەنى قايتارىپ بەردى. ولار بۇنى نە ءۇشىن سۋبسيديا دەپ ايتقانىن ءبىز بىلمەيمىز. ءوزىمىز شىعارىپ جاتقان كولىكتىڭ باعاسى قىمباتتامايدى، ال يمپورت كولىكتەردىڭ باعاسى دوللار كۋرسىنا بايلانىستى وزگەرىپ وتىرادى»، - دەدى بەكنۇر نەسىپبايەۆ.
قازاقستان اۆتوموبيل بيزنەسى قاۋىمداستىعىنىڭ ستراتەگيالىق دامۋ جونىندەگى ديرەكتورى قايرات ەلامانوۆ Kia، Hyundai، Chevrolet، Lada، Jac سياقتى وتاندىق كولىكتەر ۋتيليزاتسيالىق الىمعا جاتپايتىنىن ءتۇسىندىردى.
«ءدال وسى برەندتەر حالىقتى قولداۋعا باعىتتالعان جەڭىلدەتىلگەن اۆتونەسيە باعدارلاماسىنا قاتىسادى. سونداي-اق، بۇل اۆتوموبيلدەر نارىقتىڭ 75 پايىزىن جابادى. ياعني، بۇل ۆ جانە س ساناتتارىنا كىرەدى. بۇل حالىق اراسىندا ەڭ تانىمالى. قازىر قازاقستاندا جەڭىل جانە كوممەرتسيالىق كولىكتەر شىعاراتىن 8 اۆتوموبيل زاۋىتى بار. سونداي - اق اۋىلشارۋاشىلىق تەحينيكالارىن شىعاراتىن تاعى 8 زاۋىت جۇمىس ىستەيدى. دەمەك، يمپورتتىق برەندتەردى ايتپاعاندا، وندىرۋشىلەر اراسىندا دا باسەكەلەستىك بار»، - دەدى ول.
«ۆيراج» كومپانياسىنىڭ باس ديرەكتورى ەرمەك ەسكەرگەنوۆ وتاندىق كولىكتەردىڭ باعاسى ارزاندامايتىنىن باسا ايتتى.
«قازاقستاندا شىعارىلاتىن كولىكتەردىڭ باعاسى تومەندەمەيدى. ال ءبىز اكەلەتىن كولىكتەردىڭ قۇنى ۋتيل الىمىنا بايلانىستى بولادى. مىسالى، كەيبىر كولىكتەر ءۇشىن ۋتيل الىمى 2 ميلليون تەڭگە بولسا، وندا ول 1 ميلليون تەڭگەگە اينالادى. ياعني، باعاسى ءبىر ميلليونعا تومەندەيدى. اگروتەحنولوگيادا دا سولاي. بارلىعىن قازاقستاندا ءوندىرىپ جاتقان جوقپىز. ءىشىنارا قولدانىلاتىن ءادىس بار. ءبىز ولاردى يمپورتقا شىعارىپ، سالىقتارىن تولەپ وتىرمىز. بارلىعىن زاڭدى تۇردە اتقارامىز»، - دەدى ول.
