بومبادان پانا بولاتىن جەرگە دەرەۋ جەتۋدى ۇسىنامىز: ۋكرايناداعى قازاقستان ەلشىلىگى ۇندەۋ جاسادى
«قۇرمەتتى قازاقستان رەسپۋبليكاسىنىڭ ازاماتتارى! اسكەري قاۋىپكە بايلانىستى قازاقستان رەسپۋبليكاسىنىڭ ازاماتتارىنا جەرگىلىكتى اتقارۋشى ورگانداردىڭ نۇسقاۋلارىن قاتاڭ تۇردە ورىنداۋدى، ونىڭ ىشىندە جاقىن ماڭداعى پانالاۋ ورنىنا (بومبا باسپاناسى، جەراستى وتكەلى، جەرتولە، جەراستى تۇراعى، جەراستى توننەل جانە ت. ب.) دەرەۋ جەتۋدى ۇسىنامىز. قاۋىپتى ساتتە ءسىز تۇرعىن ءۇي-جايدا قالساڭىز، جارىقتاندىرۋدى تولىعىمەن ءوشىرىپ، تەرەزەلەرگە جاقىنداماڭىز جانە ەڭ قاۋىپسىز ورىندا بولىڭىز. اۋىز سۋ مەن ازىق-تۇلىكتى الدىن الا جيناقتاۋعا تىرىسىڭىز» دەلىنگەن حابارلامادا.
ەسكە سالا كەتەيىك، بۇگىن رەسەي پرەزيدەنتى ۆلاديمير پۋتين ۋكراينا اۋماعىندا ارنايى اسكەري وپەراتسيا جۇرگىزۋ تۋرالى شەشىم قابىلداعانىن ايتتى.
وسىعان بايلانىستى ۋكراينا پرەزيدەنتى ۆلاديمير زەلەنسكي ەل حالقىنا ۇندەۋ جاريالاپ، ۋكراينا اۋماعىندا اسكەري جاعداي رەجيمى ەنگىزىلگەنىن مالىمدەدى.
ايتا كەتەيىك، قازاقستان ۋكراينادان ەل ازاماتتارىن ەۆاكۋاتسيالاپ جاتىر. ۋكرايناداعى كۇردەلى جاعدايلارعا بايلانىستى قازىرگى ۋاقىتتا سول ەلدەگى ق ر ازاماتتارىنا تۇرعىلىقتى جەرلەرىندە بولۋ جانە ق ر ەلشىلىگىمەن جانە كونسۋلدىقتارىمەن تۇراقتى بايلانىستا بولۋ ۇسىنىلادى.
