ش ق و-نىڭ قاي قالا، اۋدانىندا كوروناۆيرۋس جۇقتىرعاندار ءجيى تىركەلدى
ش ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە سۇيەنسەك، سوڭعى تاۋلىكتە ءوڭىر بويىنشا 36 ادامنان كوروناۆيرۋس انىقتالعان. ونىڭ ىشىندە 34 ناۋقاستان اۋرۋ سيمپتومدارى بايقالدى.
جالپى وبلىس ستاتسيونارلارىندا توسەك- ورىن قورىنىڭ جۇكتەمەسى - 10,6 پايىزدى قۇراپ وتىر.
«COVID-19 پاندەمياسى باستالعالى بەرى شىعىس قازاقستاندا 59338 ادام ۆيرۋس جۇقتىردى. ونىڭ ىشىندە وسكەمەن قالاسىندا - 22032 (جالپى ساننىڭ 37 پايىزى)، سەمەيدە - 19663 (%33)، گلۋبوكوە اۋدانىندا - 2884 (%4,9)، ريددەردە - 2257 (%3,8)، التاي اۋدانىندا - 2042 (%3,4) پاتسيەنت تىركەلدى. ال كوروناۆيرۋسقا شالدىققاندار سانى بويىنشا ەڭ تومەنگى ورىندا - كۇرشىم (323 ناۋقاس) ، ءۇرجار (205) ، اباي (191) اۋداندارى تۇر»، - دەلىنگەن اقپاراتتا.
بۇگىندە شىعىس قازاقستان بويىنشا پ ت ر- سىنامالاردى تەكسەرۋدى 19 زەرتحانا جۇرگىزەدى. وسى ۋاقىتقا دەيىن وبلىس جۇرتشىلىعى سول زەرتحانالاردا 1393763 رەت سىناما تاپسىرعان. ونىڭ %4,3 ىندا كوروناۆيرۋس تابىلدى.
