10:58, 23 - اقپان 2022 | GMT +5
قازاقستان مەن يران ستاندارتتاۋ سالاسىنداعى كەلىسىمگە قول قويدى
نۇر-سۇلتان. قازاقپارات - 2022-جىلعى 21-22 - اقپاندا قازستاندارت باسشىلىعى تەگەران قالاسىندا قازاقستان مەن يران اراسىنداعى ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى بىرلەسكەن كوميسسيانىڭ 17- وتىرىسىنا قاتىستى.
بۇل تۋرالى قازاقپارات ق ر ساۋدا جانە ينتەگراتسيا مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
باسپا ءسوز قىزمەتىنىڭ مالىمەتتەرىنە قاراعاندا، يران - قازاقستاننىڭ ەڭ جاقىن ساۋدا سەرىكتەستەرىنىڭ ءبىرى، تەك 2021-جىلدىڭ وزىندە يرانعا ەكسپورت 2,1 ەسەگە ءوسىپ، 275,3 ميلليون ا ق ش دوللارىن قۇرادى.
وتىرىس بارىسىندا، قازستاندارت كەلىسسوزدەر ءۇش جىلدان استام ۋاقىت جۇرگىزىلگەن يران ستاندارتتاۋ جونىندەگى ۇلتتىق ۇيىمىمەن (INSO) ستاندارتتاۋ سالاسىنداعى كەلىسىمگە قول قويدى.
كەلىسىم يراننىڭ ۇلتتىق ستاندارتتارىنا جول اشادى جانە قازاقستاندىق كاسىپورىندار ءۇشىن ەكسپورتقا جاعدايلار جاسايدى.
