مەملەكەت باسشىسى دەنساۋلىق ساقتاۋ ءمينيسترى اجار عينياتتى قابىلدادى

نۇر- سۇلتان. قازاقپارات - مەملەكەت باسشىسى دەنساۋلىق ساقتاۋ ءمينيسترى اجار عينياتتى قابىلدادى. قاسىم- جومارت توقايەۆقا ەلىمىزدەگى ەپيدەميولوگيالىق احۋال تۋرالى باياندالدى، دەپ حابارلايدى اقوردانىڭ باسپا ءسوز قىزمەتى.

ءمينيستردىڭ ايتۋىنشا، قاڭتاردىڭ ورتاسىندا كوروناۆيرۋس ينفەكسياسىن جۇقتىرعاندار سانى تاۋلىگىنە 16500 ادام بولسا، بۇگىندە شامامەن 1500 ادام تىركەلگەن. جالپى ەلىمىزدەگى ەپيدەميولوگيالىق احۋال تۇراقتى. قازىرگى ۋاقىتتا ستاتسيونارلاردىڭ 20 پايىزىندا عانا ناۋقاستار ەم الىپ جاتىر. سونداي- اق اجار عينيات كوپتەگەن شەكتەۋ شارالارىنىڭ الىنعانىن، وقۋشىلاردىڭ ءداستۇرلى وقىتۋ جۇيەسىنە، كاسىپورىندارداعى جۇمىسشىلاردىڭ وففلاين جۇمىس ىستەۋىنە رۇقسات بەرىلگەنىن اتاپ ءوتتى.

ۆەدومستۆو باسشىسى ريەۆاكسينالاۋ جۇمىستارىنا ەرەكشە كوڭىل ءبولىنىپ وتىرعانىن جەتكىزدى. مينيستر پرەزيدەنتكە دەنساۋلىق ساقتاۋ سالاسىن جەتىلدىرۋ جونىندەگى جوسپارىن تانىستىردى.

ونىڭ ايتۋىنشا، مينيسترلىكتىڭ جۇمىس جوسپارى ەڭ الدىمەن العاشقى مەديتسينالىق كومەكتى جەتىلدىرۋگە، اۋىل- ايماقتارداعى دەنساۋلىق ساقتاۋ جۇيەسىنىڭ ساپاسىن ارتتىرۋعا باعىتتالعان. سونىمەن قاتار بيىل بالالار جىلى بولىپ جاريالانعاندىقتان، بالالاردىڭ دەنساۋلىعىنا كوپ كوڭىل بولىنەدى. اتاپ ايتقاندا مەكتەپتەگى مەديتسينانىڭ جاڭا ءتارتىبى مەن ستاندارتى قابىلدانادى.

مەملەكەت باسشىسى مينيسترلىكتىڭ جۇمىس باعىتىن قولدايتىنىن ايتىپ، دەنساۋلىق ساقتاۋ سالاسىن ودان ءارى دامىتۋ جونىندەگى جۇمىستاردى جالعاستىرۋدى تاپسىردى.