پرەزيدەنت ارقاسىنا ۇتىك باسقان بەلسەندى تۋرالى پىكىر ءبىلدىردى
«ادامداردىڭ قۇقىقتارىنىڭ قورعالۋىنا بايلانىستى جاڭا عانا ءوزىڭىز ايتىپ ءوتتىڭىز. ەندى وسىعان توقتالايىق. كۇلبىلتەلەمەي بىردەن ايتساق، بۇل ازاپتاۋ فاكتىلەرى تۋرالى. مىسالى ءۇشىن ءوزىمىز دە كوردىك. الەۋمەتتىك جەلىلەردەگى ۆيدەولاردى، جازبالاردى ساي-سۇيەگىڭ سىرقىراپ قارايسىڭ. اسىرەسە ارقاسىنا ۇتىك باسىلعان تالدىقورعاندىق ازامات باتىربايەۆ دەگەن جىگىتكە قاتىستى. وسىدان حاباردارسىز با؟»، - دەپ سۇراق قويدى جۋرناليست جاينا سلامبەك.
پرەزيدەنت بۇل ماسەلە جونىندە جاقسى بىلەتىنىن ايتتى.
«كەيبىر ازاماتتارىمىز مەنىڭ اتىما بەينە ۇندەۋ جازىپ، الەۋمەتتىك جەلىلەردە تاراتىپ جاتىر. مۇنى دا ءبىلىپ وتىرمىن. وسىعان بايلانىستى مەن ىشكى ىستەر مينيسترلىگى مەن باس پروكۋراتۋراعا ارنايى تاپسىرما بەردىم. «شاش ال دەسە، باس الاتىن» ارەكەتتەرگە جول بەرۋگە بولمايدى»، - دەپ اتاپ ءوتتى پرەزيدەنت.
مەملەكەت باسشىسىنىڭ ايتۋىنشا، قوعامدىق كوميسسيالار ءوز جۇمىسىنا كىرىسىپ كەتتى. ادام قۇقىقتارى جونىندەگى ۋاكىل ەلۆيرا ءازىموۆا، بەلگىلى قۇقىق قورعاۋشىلار: ايمان وماروۆا، جەمىس تۇرماعامبەتوۆا، ابزال قۇسپان جانە باسقا دا زاڭگەرلەر جينالىپ، ارنايى كوميسسيالار قۇردى.
«ولار ءار ءىستىڭ زاڭدىلىعىن قاراپ جاتىر. قوعامدىق كوميسسيالارعا سەنىمسىزدىك كورسەتۋگە ەشقانداي سەبەپ تە، حاقىمىز دا جوق. بيلىك تە، قۇقىق قورعاۋ ورگاندارى دا جۇمىستارىنا ارالاسپايدى. مەن دە ارالاسپايمىن. ءاربىر قۇقىقبۇزۋشىلىق دەرەگى بويىنشا شارالار قابىلدانادى. كىنالى ادامدار جازاعا تارتىلادى. مەن ءۇشىن ازاماتتارىمىزدىڭ قۇقىعى اسا ماڭىزدى. اسىرەسە، قازىرگى تاڭدا مۇنى ەڭ ماڭىزدى ماسەلە دەپ ايتۋعا بولادى. ءاربىر ءىس بويىنشا ءادىل شەشىم شىعارۋ مەن ءۇشىن نەگىزگى پرينتسيپ بولىپ تابىلادى»، - دەدى ق. توقايەۆ.
