پرەزيدەنت: بەيبىت تۇرعىنداردى لاڭكەستەردەن ءبولىپ الۋىمىز كەرەك
«مەن وسى سۇراققا بىرنەشە رەت جاۋاپ بەردىم. مۇنىڭ الدىن الا جوسپارلانعان ارەكەت ەكەنى انىقتالدى. ارنايى دايىندىقتان وتكەن قىلمىستىق توپتار، لاڭكەستەر وقيعانىڭ بەل ورتاسىندا ءجۇرىپ، قاراقشىلاردى، قۇقىق بۇزۋشىلاردى باسقاردى. ارينە، بۇزاقى توپتاردىڭ اراسىندا بەيبىت ازاماتتار دا بولدى»، - دەدى مەملەكەت باسشىسى.
ونىڭ ايتۋىنشا، ارانداۋعا ەرگەن بەيبىت شەرۋشىلەردى لاڭكەستەردەن، قاراقشىلاردان ءبولىپ الۋىمىز كەرەك.
«بۇل - وتە كۇردەلى ماسەلە. مۇنىڭ ءبارىن تەرگەۋ جۇمىستارى انىقتايدى. جالپى، مىنا نارسەنى دۇرىس ءتۇسىنۋىمىز كەرەك. الاڭدا شىققانداردىڭ ءبارىن تۇگەل بەيبىت شەرۋشى دەپ ايتۋعا بولمايدى. بۇل ەشقانداي اقىلعا سىيمايتىن نارسە. كوزى اشىق، ارى تازا ادام مۇنداي جالعان تۇجىرىمعا ەشقاشان سەنبەيدى. ەڭ الدىمەن، لاڭكەستەر جاعدايدى ۋشىقتىردى. ولاردىڭ ماقساتى - ەلدىڭ تۇتاستىعىن بۇزۋ، حالىقتى قورقىتۋ. ال، بەيبىت شەرۋشىلەر سولاردىڭ قارماعىنا ءتۇستى. قازىر سول كىناسىز ازاماتتاردىڭ قۇقىعىن قورعاۋىمىز كەرەك. مەن ءاربىر ءىس بويىنشا مۇقيات تەرگەۋ جۇرگىزۋ كەرەك دەپ ايتتىم. ادامداردىڭ قۇقىعىن بۇزعان تۇلعالار جازاعا تارتىلادى. ءبىز بۇعان قاجەتتى شارانىڭ ءبارىن قابىلدايمىز. ەش كۇمان بولماسىن»، - دەدى پرەزيدەنت.
