ميتينگكە شىققانداردىڭ ءبارى لاڭكەس پە - پرەزيدەنت جاۋابى
«قاڭتار قاسىرەتىنە» كەلەيىك. جىل باسىنداعى قاندى وقيعا، وكىنىشكە قاراي، كوپ ادامنىڭ ءومىرىن جالمادى. ميتينگكە شىققانداردىڭ ءبارى لاڭكەس پە؟ نەگىزى، ادامدار باسىندا بەيبىت شەرۋگە شىقتى ەمەس پە؟»، - دەپ سۇراق قويدى جۋرناليست جاينا سلامبەك.
«ارينە، باستاپقىدا بەيبىت شەرۋلەر بولدى. مۇنى ءبارىمىز كوردىك. ەلىمىزدىڭ ءار ايماعىندا ازاماتتار الاڭعا جينالىپ، ءوز تالاپتارىن ايتتى، ءتىپتى، نارازىلىقتارىن ءبىلدىردى. شىنىن ايتساق، اۋەلدە ەشقانداي قيراتۋ، قىلمىستىق ارەكەتتەر بولعان جوق. ءبىراق، جاعداي كەيىن مۇلدەم باسقا ارناعا بۇرىلىپ كەتتى. ارانداتۋشىلار مەن قاراقشىلار پايدا بولدى. ولاردىڭ شىنايى ماقساتى بەيبىت ميتينگكە قاتىسۋ ەمەس، بيلىككە شابۋىل جاساۋ بولدى. ءبىر سوزبەن ايتقاندا، سوڭىنا قاراي الاڭعا ناعىز لاڭكەستەر شىقتى. بۇلىكشىلەر مىڭداعان قارۋ-جاراقتى ۇرلاپ كەتتى. قازىرگى ۋاقىتتا پوليتسيا ولاردى ىزدەپ جاتىر. ازىرگە تۇگەلدەي تابىلعان جوق. بۇزاقىلار سول قارۋدان تاعى دا ادام اتۋى ابدەن مۇمكىن. سوندا مۇنى كىم ىستەدى دەگەن سۇراق تۋادى؟ كىم جاسادى؟ بەيبىت شەرۋگە شىققاندار ما؟ شىن مانىندە، بۇل - كاسىبي قاراقشىلاردىڭ ءىسى»، - دەپ جاۋاپ بەردى ق. توقايەۆ.
