اقىلبەك كۇرىشبايەۆ اۋىل شارۋاشىلىعى مينيسترلىگىنىڭ وزگە مەمورگاندارعا كىرىپتارلىعىن ايتتى
سەناتور ق ر پرەمەر-ءمينيسترى ءاليحان سمايىلوۆتىڭ اتىنا جولداعان دەپۋتاتتىق ساۋالىندا اگرارلىق سالانى قارجىلاندىرۋداعى پوبلەمالاردى كوتەردى. ونىڭ مالىمەتى بويىنشا، وتكەن 4 جىلدا اگروونەركاسىپ كەشەنىن دامىتۋ جونىندەگى مەملەكەتتىك باعدارلامالاردى ىسكە اسىرۋعا 2 ميلليارد تەڭگە ءبولۋ جوسپارلانعان. الايدا ءىس جۇزىندە تەك 1,6 ميلليارد تەڭگە عانا جۇمسالعان. سەناتور اۋىل شارۋاشىلىعى ۆەدومستۆوسىنىڭ وزگە مەملەكەتتىك ورگاندارعا كىرىپتارلىعى كەيبىر كەزدە شۇعىل شەشىم قابىلداپ، ارەكەت ەتۋگە كەدەرگى كەلتىرەتىندىگىن ايتتى.
«بىزدە اۋىل شارۋاشىلىعى ءمينيسترىنىڭ بارلىق نەگىزگى نورماتيۆتىك بۇيرىقتارى مىندەتتى تۇردە باسقا مەملەكەتتىك ورگاندارمەن كەلىسىلەدى. 2020-2021 -جىلدارى سۋبسيديالاۋ قاعيدالارىن، رەگلامەنتتەردى كەلىسۋگە 20-30 كۇننەن جەتى ايعا دەيىن ۋاقىت كەتتى. بۇل جەردە سالانى جەدەل باسقارۋ تۋرالى قالاي ايتۋعا بولادى»، - دەدى سەناتور.
دەپۋتات بىلتىرعى قۇرعاقشىلىق اگروبيزنەسكە قاتتى اسەر ەتكەنىن ەسكە سالدى. ال ونىمدەردى ەكسپورتتاۋعا تىيىم سالۋ جانە كۆوتالاردى ەنگىزۋ شارۋالاردىڭ تابىسىن شەكتەپ تاستاعان.
«بيىل كوپتەگەن اۋىلشارۋاشىلىق تاۋار وندىرۋشىلەرى ەگىستىكتەردە قار توقتاتۋ شاراسىن ۇيىمداستىرا المادى. بۇل ماسەلەلەر كوكتەمدە توپىراقتىڭ ىلعالدىلىعىنا كەرى اسەرىن تيگىزەتىنى انىق. سوندىقتان بيىل قالىپتاسقان جاعدايدا مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا ەگىن ەگۋ جۇمىستارىن ۋاقتىلى جۇرگىزۋ ءۇشىن شارۋاشىلىقتارعا بارلىق جاعداي جاساۋ جونىندەگى تاپسىرماسىن ساپالى ورىنداۋ وتە ماڭىزدى»، - دەدى اقىلبەك كۇرىشبايەۆ.
