قاسىم-جومارت توقايەۆ ۆ ت ب بانكى باسقارماسىنىڭ پرەزيدەنتى اندرەي كوستيندى قابىلدادى
كەزدەسۋ بارىسىندا قاسىم-جومارت توقايەۆقا قازاقستانداعى بىرلەسكەن جوبالار تۋرالى اقپارات بەرىلدى.
اندرەي كوستين 2020-2021-جىلدارى قازاقستاننىڭ ءىرى مەملەكەتتىك جانە جەكەمەنشىك كومپانيالارىمەن جالپى قۇنى 6 ميلليارد دوللاردان اساتىن ءبىرقاتار ماڭىزدى كەلىسىمگە قول قويىلعانىن حابارلادى.
ۆ ت ب قارجىلاندىراتىن قازاقستاندىق جوبالارداعى قاراجاتتىڭ جالپى كولەمى 11,5 ميلليارد دوللارعا جەتكەن.
«KAZ Minerals» كومپانياسىنىڭ قارجىلاندىرىلۋى وسى جىلدىڭ اسا ۇلكەن كەلىسىمى بولدى.
ERG كومپانياسىمەن نەسيە كەلىسىمدەرى جاڭعىرتىلىپ، «سامۇرىق-قازىنا» قورىمەن جانە ونىڭ ەنشىلەس ۇيىمدارى - اتىراۋ مۇناي وڭدەۋ زاۋىتى، «قازاقستان تەمىر جولى» ۇلتتىق كومپانياسى جانە «قازترانس گاز» اكسيونەرلىك قوعامىمەن ءبىرقاتار نەسيەلىك كەلىسىم ىسكە اسىرىلدى. سونىمەن قاتار قازاقستان پرەزيدەنتىنە ۆ ت ب بانكىنىڭ جوبالىق قارجىلاندىرۋ، سونىڭ ىشىندە جاسىل ەنەرگەتيكا باعىتىنداعى جۇمىستارىنىڭ پەرسپەكتيۆتى باعىتتارى تۋرالى اقپارات بەرىلدى.
قاسىم-جومارت توقايەۆ اندرەي كوستيندى جوعارى مەملەكەتتىك ناگرادا - «دوستىق» وردەنىن الۋىمەن قۇتتىقتادى.
