قازاقستان ب ۇ ۇ ادام قۇقىقتارى جونىندەگى كەڭەسىنە سايلاندى
قازاقستان كەڭەستەگى جۇمىسىنىڭ باسىم باعىتتارى گەندەرلىك تەڭدىكتى ىلگەرىلەتۋ جانە ايەلدەردىڭ قۇقىقتارى مەن مۇمكىندىكتەرىن كەڭەيتۋ، ءولىم جازاسىن جاپپاي جويۋ، توزبەۋشىلىكتىڭ بارلىق نىساندارىنا قارسى كۇرەس، ءدىن مەن سەنىم بوستاندىعى، ينكليۋزيۆتى جانە جالپىعا بىردەي ءبىلىم بەرۋدى قامتاماسىز ەتۋ، سونداي- اق COVID-19 پاندەمياسى جاعدايىندا ادام قۇقىقتارىن قۇرمەتتەۋ بولادى.
ەلىمىزدىڭ دۇنيەجۇزىلىك ۇيىمنىڭ باس قۇقىق قورعاۋ ورگانىنا سايلانۋى ونىڭ ادام قۇقىقتارى مەن بوستاندىقتارىن قورعاۋ سالاسىنداعى حالىقارالىق نورمالار مەن ستاندارتتاردى ىلگەرىلەتۋ پروتسەسىنە بەلسەندى جانە جاۋاپتى قاتىسۋشى رەتىندەگى ءرولىن مويىنداۋ بولىپ تابىلادى.
قازاقستانمەن بىرگە ب ۇ ۇ ادام قۇقىقتارى جونىندەگى كەڭەسىنىڭ قۇرامىنا ا ق ش، ليۋكسەمبۋرگ، فينليانديا، ليتۆا، چەرنوگوريا، ارگەنتينا، گوندۋراس، پاراگۆاي، بەنين، كامەرۋن، ەريترەيا، گامبيا، سومالي، ءۇندىستان، مالايزيا، قاتار جانە بىرىككەن اراب امىرلىكتەرى كىردى. بۇعان دەيىن ەلىمىز ادام قۇقىقتارى جونىندەگى كەڭەسكە 2013- 2015 -جىلدارى سايلانعان بولاتىن.
ادام قۇقىقتارى جونىندەگى كەڭەس - ب ۇ ۇ جۇيەسىنىڭ ۇكىمەتارالىق ورگانى، ونىڭ قۇرامىنا الەمدەگى ادام قۇقىقتارىن كوتەرمەلەۋگە جانە قورعاۋعا جاۋاپتى 47 مەملەكەت كىرەدى. كەڭەس قۇزىرەتىنە ونىڭ نازارىن تالاپ ەتەتىن ادام قۇقىقتارى سالاسىنداعى بارلىق تاقىرىپتىق ماسەلەلەر مەن جاعدايلاردى تالقىلاۋ كىرەدى. كەڭەس مۇشەلەرى بەس وڭىرلىك توپتان سايلانادى جانە ءوز مىندەتتەرىن ءۇش جىل بويى اتقارادى. ادام قۇقىقتارى جونىندەگى كەڭەستىڭ وتىرىستارى ب ۇ ۇ- نىڭ جەنيەۆاداعى بولىمشەسىندە وتەدى.
