مەملەكەت باسشىسى نۇر-سۇلتان قالاسىنىڭ اكىمى التاي كولگىنوۆتى قابىلدادى

نۇر-سۇلتان. قازاقپارات - قاسىم-جومارت توقايەۆقا نۇر-سۇلتان قالاسىنىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى مالىمەت بەرىلدى، دەپ حابارلايدى اقوردانىڭ باسپا ءسوز قىزمەتى.

پرەزيدەنتكە كەزەكتە تۇرعان ەلوردالىقتاردى قولجەتىمدى باسپانامەن قامتۋ، ءۇش اۋىسىمدا وقىتۋ ماسەلەسىن شەشۋ، ينۆەستيتسيا تارتۋ، الەۋمەتتىك ماڭىزى بار ازىق-تۇلىك باعاسىن تۇراقتاندىرۋ جانە «حالىق ۇنىنە قۇلاق اساتىن مەملەكەت» تۇجىرىمداماسىنىڭ اياسىندا كۇشەيتىلگەن كەرى بايلانىس تۋرالى باياندالدى.

قالا اكىمىنىڭ ايتۋىنشا، بيىل 10 مىڭ الەۋمەتتىك پاتەر سالىنادى. بۇل كورسەتكىش بۇرىنعى جىلدارمەن سالىستىرعاندا ەداۋىر ارتقان.

مىسالى، 2020-جىلى - 7 مىڭ، 2019-جىلى - 2900، 2018-جىلى - 1800 الەۋمەتتىك پاتەر پايدالانۋعا بەرىلگەن.

سونىمەن قاتار بيىل 40 مىڭ وقۋشىعا ارنالعان 15 مەكتەپ عيماراتى پايدالانۋعا بەرىلگەن. مەملەكەت باسشىسىنا قالاداعى اياقتالعان ۇلەستىك قۇرىلىستاردىڭ جانە گازداندىرۋ، قالا شەتىندەگى ەلدى مەكەندەردى دامىتۋ، سيفرلاندىرۋ، اباتتاندىرۋ جۇمىستارىنىڭ قورىتىندىسى تۋرالى ايتىلدى.

التاي كولگىنوۆ قالاداعى ەپيدەميولوگيالىق جاعدايدى تۇراقتاندىرۋ شارالارى مەن ۆاكسينالاۋ بويىنشا ەسەپ بەردى.

قاسىم-جومارت توقايەۆ ەلوردانى ودان ءارى دامىتۋعا، اتاپ ايتقاندا گازبەن قامتۋعا، ينۆەستيتسيا تارتۋعا، ۇلەستىك قۇرىلىسقا قاتىستى ماسەلەلەردى شەشۋگە جانە جىلىتۋ ماۋسىمى بارىسىندا قازاندىقتاردىڭ ۇزدىكسىز جۇمىس ىستەۋىنە قاتىستى ءبىرقاتار تاپسىرما بەردى.