ەكونوميكادا سەنىمدى ءوسۋ بار - اسقار مامين

نۇر- سۇلتان. قازاقپارات - ۇكىمەت باسشىسى اسقار مامين ۇلتتىق ەكونوميكانىڭ ءوسۋ سەرپىنىن «سەنىمدى» دەپ باعالادى. بۇل تۋرالى ول ۇكىمەت وتىرىسىندا ايتتى، دەپ حابارلايدى قازاقپارات ءتىلشىسى.

«ۇلتتىق ەكونوميكادا سەنىمدى ءوسۋ سەرپىنى بايقالادى. توعىز ايدىڭ قورىتىندىسى بويىنشا جالپى ىشكى ءونىمنىڭ ءوسىمى 3,4 پايىزعا دەيىن قارقىن الدى. ەكونوميكا دامۋىنىڭ نەگىزگى درايۆەرى ناقتى سەكتورداعى ءوندىرىستىڭ تۇراقتى ءوسۋى بولدى. وڭدەۋ ونەركاسىبىنىڭ كولەمى 5,7 پايىزعا ءوستى. سونىڭ ىشىندە، ماشينا جاساۋدا 22,8, اۆتوموبيل قۇرىلىسىندا 31,6 پايىز، لوكوموتيۆتەر مەن ۆاگوندار وندىرىسىندە 50,5, قۇرىلىس ماتەريالدارىندا 10,1، فارماتسيەۆتيكادا 38,1، پلاستماسسا بۇيىمدارى وندىرىسىندە 31,4، كيىم وندىرىسىندە 14, جيھازدا 14,9، دايىن مەتال بۇيىمدارىن شىعارۋدا 17,2 پايىز ءوسىم بايقالادى»، - دەگەن پرەمەر- مينيستر.

قىزمەت كورسەتۋ سەكتورى دا كارانتيندىك شەكتەۋلەردىڭ ازايۋيىنا بايلانىستى سەنىمدى تۇردە قالپىنا كەلىپ جاتقانىن ەسكە سالدى.

«قازىر قىزمەت كورسەتۋ سەكتورى ساۋدا مەن بايلانىستاعى جوعارى ءوسۋ قارقىنى ەسەبىنەن 2,9 پايىزدى قۇرادى»، - دەدى ۇكىمەت باسشىسى.