قاسىم- جومارت توقايەۆ «سيبۋر حولدينگ» كومپانياسىنىڭ باسشىسىن قابىلدادى

نۇر- سۇلتان. قازاقپارات - پرەزيدەنت قاسىم- جومارت توقايەۆ «سيبۋر حولدينگ» كومپانياسىنىڭ باسقارما ءتوراعاسى دميتريي كونوۆتى قابىلدادى، دەپ حابارلايدى اقوردا.

مەملەكەت باسشىسى كومىرسۋتەگىن ساپالى وڭدەۋ ءىسى بۇگىندە قازاقستاننىڭ مۇناي- گاز سالاسىنداعى باسىم باعىتتارىنىڭ ءبىرى ەكەنىن اتاپ ءوتتى. پرەزيدەنت پوليپروپيلەن جانە پوليەتيلەن ءوندىرىسى جونىندەگى جوبالارعا قاتىستى ىنتىماقتاستىق تۋرالى كەلىسىمگە قول قويىلۋىن قۇپتادى.

بۇل جوبالاردى «سامۇرىق- قازىنا» مەن «قازمۇنايگاز» كومپانيالارى جۇزەگە اسىرىپ جاتىر. قاسىم- جومارت توقايەۆ اتالعان كەلىسىمدى قازاقستان مەن رەسەيدىڭ سەرىكتەستىك قارىم- قاتىناستارىن ودان ءارى نىعايتۋعا تىڭ سەرپىن بەرەدى دەپ سانايدى.

«سەرىكتەستىگىمىزدىڭ باستالعانىنا قۋانىشتىمىز. سىزدەر مۇناي- حيميا كەشەنىنىڭ قۇرىلىسىنا قاتىستى ماسەلەلەرمەن بىرلەسىپ اينالىساسىزدار. قازاقستان ۇكىمەتى مەنىڭ تاپسىرمام بويىنشا جوبالاردى ىسكە اسىرۋعا جان- جاقتى كومەك كورسەتەدى. ءبىز ءىس جۇزىندە ناقتى ناتيجەگە قول جەتكىزۋگە ءتيىسپىز. جۋىردا وتكەن قازاقستان مەن رەسەيدىڭ ءوڭىرارالىق فورۋمىندا ۆلاديمير پۋتين ەكەۋمىز ەكى ەل اراسىنداعى ەكونوميكالىق ىقپالداستىق ماسەلەلەرىن مۇقيات زەردەلەۋگە جانە ناقتى ناتيجەلەرگە قول جەتكىزۋگە كەلىستىك»، - دەدى مەملەكەت باسشىسى.

«سيبۋر حولدينگ» كومپانياسىنىڭ باسشىسى دميتري كونوۆ قاسىم- جومارت توقايەۆقا قازاقستانمەن اراداعى ىنتىماقتاستىقتىڭ پەرسپەكتيۆالارى مەن رەسەيدەگى بىرىككەن ءىرى مۇناي- گاز كومپانياسىنىڭ دامۋ جوسپارى تۋرالى ايتتى.

« بۇگىندە قازاقستاندا پوليپروپيلەن ءوندىرۋ جوباسى بويىنشا جاقسى بازا قالىپتاسقان. ونىڭ قۇرىلىسى اياقتالۋعا جاقىن. قازىرگى كەزەڭدە كادرلاردى دايارلاۋعا كومەكتەسۋدىڭ تيىمدىلىگىن كورىپ وتىرمىز. بۇل باعىتتاعى جۇمىستاردى باستاپ تا كەتتىك. «قازمۇنايگاز» كومپانياسىنىڭ 100 گە جۋىق قىزمەتكەرى دايىندىقتان ءوتتى، بۇل جۇمىستى جالعاستىرا بەرەمىز»، - دەدى دميتري كونوۆ.

ونىڭ ايتۋىنشا، «سيبۋر» كومپانياسى مۇناي- گاز حيمياسى سالاسىنداعى باسقا دا جوبالارعا قاتىسۋعا دايىن.