مەملەكەت باسشىسى اسقار ماميندى قابىلدادى
قاسىم-جومارت توقايەۆقا ەلىمىزدەگى سانيتارلىق- ەپيدەميولوگيالىق احۋال، استىق جيناۋ ناۋقانى، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ شارالارى، ينۆەستيتسيا تارتۋ جۇمىستارى جانە الەۋمەتتىك-ەكونوميكالىق دامۋدىڭ باسقا دا وزەكتى ماسەلەلەرى تۋرالى ەسەپ بەرىلدى.
پرەمەر-مينيستر پرەزيدەنتكە ەپيدەميولوگيالىق جاعدايدىڭ تۇراقتالعانى تۋرالى باياندادى.
ۇكىمەتتىڭ مالىمەتىنە سايكەس سوڭعى ايدا ەلىمىز بويىنشا كوروناۆيرۋس جۇقتىرۋ كورسەتكىشى 1,7 ەسەگە ازايعان. اۋرۋدىڭ ءورشۋ دەڭگەيى - 0,94، جۇقپالى اۋرۋلار بولىمدەرىنىڭ 34 پايىزىندا، جان ساقتاۋ بولىمشەلەرىنىڭ 32 پايىزىندا ناۋقاستار ەم قابىلداپ جاتىر.
مەملەكەت باسشىسىنا حالىققا ەكپە سالۋ جۇمىستارى جوسپارلى تۇردە جالعاسىپ جاتقانى ايتىلدى.
اسقار ماميننىڭ مالىمەتى بويىنشا، قازىرگى تاڭدا ەكپەنىڭ ءبىرىنشى كومپونەنتى 7,7 ميلليون، ەكىنشى كومپونەنتى 6,7 ميلليون ادامعا سالىنعان.
وسى جىلدىڭ IV توقسانىندا Pfizer ۆاكسيناسىنىڭ 4 ميلليون دوزاسى جەتكىزىلمەك. جالپى جىل سوڭىنا دەيىن 13,3 ميلليوننان استام ازاماتتىڭ QazVac ، سپۋتنيك V، Sinopharm، Hayat-Vax، SinoVac جانە Pfizer ۆاكسينالارىن سالدىرۋعا مۇمكىندىگى بولادى.
سونىمەن قاتار قاسىم-جومارت توقايەۆقا تۇماۋعا قارسى ۆاكسينا سالۋ جۇمىستارى جونىندە ايتىلدى.
بۇگىنگە دەيىن 694 مىڭنان استام ادام ەكپە العان. جالپى 2,5 ميلليون ادامعا ەكپە ەگۋ جوسپارلانىپ وتىر. اسقار مامين پرەزيدەنتكە استىق جيناۋ ناۋقانىنىڭ بارىسى، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ ءۇشىن جۇرگىزىلىپ جاتقان جۇمىستار، ينفلياتسياعا قارسى قابىلدانعان شارالار كەشەنىن جۇزەگە اسىرۋ تۋرالى دا باياندادى.
مەملەكەت باسشىسىنا ەكونوميكانىڭ پەرسپەكتيۆتى سالالارىنا ساپالى ينۆەستيتسيا تارتۋ ماسەلەسى جونىندە مالىمەت بەرىلدى.
ۇكىمەت شەتەلدەن تىكەلەي تارتىلاتىن ينۆەستيتسيا كولەمىن 30 ميلليارد ا ق ش دوللارىنا دەيىن جەتكىزۋ جانە 2025-جىلعا قاراي جالپى ىشكى ءونىمنىڭ نەگىزگى كاپيتالىنداعى ينۆەستيتسيانىڭ ۇلەسىن 30 پايىزعا دەيىن ارتتىرۋ جۇمىستارىن جۇرگىزۋدە.
