كوروناۆيرۋس: الەكسەي سوي ريەۆاكسيناتسيانىڭ ىقتيمال كەزەڭىن اتادى
بۇل تۋرالى ق ر دەنساۋلىق ساقتاۋ ءمينيسترى الەكسەي سوي ورتالىق كوممۋنيكاتسيلار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.
«قازىر الەمدە ريەۆاكسيناتسيا جۇرگىزۋدىڭ جولدارى زەرتتەلىپ جاتىر. قازاقستان دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا وڭىرىندەگى جوعارى دەڭگەيلى جۇمىس توبىنا كىردى. وسى توپ ەۋروپا ءوڭىرى بويىنشا ريەۆاكسيناتسيانىڭ ستاندارتتارىمەن، ستراتەگياسىمەن اينالىسىپ جاتىر. ريەۆاكسيناتسياعا ابايلاپ كەلۋ كەرەكتىگى جونىندە الدىن الا ۇسىنىم شىعارىلعان بولاتىن. ونىڭ وزىندە ءبىرىنشى كەزەكتە حالىقتىڭ وسال بۋىنى مەن الدىڭعى ساپتاعى قىزمەتكەرلەر، ۆيرۋسقا قارسى انتيدەنەسى جوق ازاماتتار ەكپە الۋى كەرەكتىگى ايتىلعان. ياعني قازىر ريەۆاكسيناتسيانىڭ نەشە مارتە بولۋى كەرەكتىگى، قاي ۆاكسينانىڭ ءتۇرىن ەگۋ قاجەتتىگى، دوزانىڭ مولشەرى ءبىزدىڭ يممۋنداي جونىندەگى ىشكى كوميسسيادا تالقىلانىپ جاتىر»، - دەدى مينيستر.
ۆەدومستۆو باسشىسى جۋىق ارادا ۆەدومستۆوارالىق كوميسسيادا ريەۆاكسيناتسيا باعدارلاماسىنىڭ ولشەمدەرى ۇسىنىلاتىنىن اتادى.
«ءبىز الەمدى ءجىتى باقىلاپ وتىرمىز. ءتۇرلى تاسىلدەر بار. جالپى، ديناميكا بايقالىپ وتىر. 6 دان 10 ايعا دەيىن مەرزىمنەن كەيىن ريەۆاكسيناتسيا باستالىپ جاتىر. ءبىرىنشى كەزەكتە، ريەۆاكسيناتسيا يممۋنداۋ بىلتىر باستالىپ كەتكەن ەلدەردە ءجۇرىپ جاتىر. ياعني، بىلتىر قاراشا، جەلتوقسان ايىندا ۆاكسيناتسيانى باستاعان ەلدەردە ەكپەنىڭ ەكىنشى دوزاسى بەرىلگەنىنە 9 ايدان اسىپ كەتتى. سوندىقتان، ول ەلدەردە ريەۆاكسيناتسيا وتە وزەكتى بولىپ وتىر. بىزدە بۇل ۋاقىت قاراشا، جەلتوقسان ايلارىنا كەلەدى»، - دەگەن الەكسەي سوي قازاقستاندا ريەۆاكسيناتسيا الەمدە بەلگىلى ءبىر تاجىريبە قالىپتاسقان كەزدە جۇرگىزىلەتىنىن ەسكەرتتى.
«سوندىقتان قازىر ۋاقىت بار. وسى ۋاقىتتا ءبىز الەمدە بار تاجىريبەنى الۋىمىز كەرەك. ريەۆاكسيناتسيانى باستاپ كەتكەن ەلدەردى باقىلاپ وتىرمىز. ونىڭ تيىمدىلىگىن قاراپ وتىرمىز. مەنىڭ ويىمشا جۋىق ارادا ريەۆاكسيناتسيانى قالاي ۇيىمداستىراتىنىمىز، مەرزىمى قانداي بولاتىنى تۋرالى ناقتى باعدارىمىز دايىن بولۋى كەرەك. سوندىقتان ريەۆاكسيناتسيا ماسەلەسى بىزدەن اسىعۋدى تالاپ ەتىپ تۇرعان جوق. ءبارىن ساۋاتتى تارازىلاپ، دەرەكتەر كوزىن تەكسەرىپ، حالىقارالىق تاجىريبەنى زەردەلەپ، ۆەدومستۆوارالىق كوميسسيا ماقۇلداعان بويدا حابارلايمىز»، - دەدى دەنساۋلىق ءمينيسترى.
اۆتور: مارلان جيەمباي
