مەملەكەت باسشىسىنا جامبىل وبلىسىنىڭ ينۆەستيتسيالىق جوبالارى تانىستىرىلدى
قاسىم- جومارت توقايەۆ جامبىل وبلىسىنا جۇمىس ساپارى اياسىندا ايماقتىڭ الەۋمەتتىك- ەكونوميكالىق احۋالى، ينۆەستيتسيالىق جوبالاردىڭ جۇزەگە اسىرىلۋى جانە تاراز قالاسىنىڭ دامۋ پەرسپەكتيۆالارى تۋرالى وبلىس اكىمى بەردىبەك ساپاربايەۆتىڭ ەسەبىن تىڭدادى.
بەردىبەك ساپاربايەۆ پرەزيدەنتكە «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى جولداۋدا بەرىلگەن تاپسىرمالاردىڭ ورىندالۋ بارىسى تۋرالى اقپارات بەردى.
بيىلعى سەگىز ايدىڭ قورىتىندىسى بويىنشا ەكونوميكانىڭ نەگىزگى باعىتتارىندا دامۋدىڭ وڭ قارقىنى ساقتالعان، ونەركاسىپ، اۋىل شارۋاشىلىعى، قۇرىلىس، كولىك، ساۋدا، بايلانىس سالالارىندا ءوسىم بايقالادى. سالىق تۇسىمدەرى مەن ەڭبەكاقى ارتقان. وسى مەرزىم ىشىندە 372,9 مىڭ شارتى مەتر تۇرعىن ءۇي پايدالانۋعا بەرىلىپ، 232,6 ميلليارد تەڭگە كولەمىندە ينۆەستيتسيا تارتىلعان.
كاسىپكەرلىكتى قولداۋدىڭ 2025 -جىلعا دەيىنگى باعدارلاماسى اياسىندا جامبىل وبلىسىندا قۇنى 2,5 تريلليون تەڭگە بولاتىن 107 ينۆەستيتسيالىق جوبانى ىسكە اسىرۋ جوسپارلانىپ وتىر. مەملەكەت باسشىسىنا بيىل قۇنى 171 ميلليارد تەڭگە بولاتىن 31 جوبانىڭ جۇزەگە اسىرىلاتىنى، سونداي- اق 8-ايدىڭ ىشىندە 78,2 ميلليارد تەڭگە كولەمىندەگى قارجىعا 13 جوبانىڭ ىسكە قوسىلعانى جونىندە باياندالدى.
وبلىس اكىمىنىڭ ايتۋىنشا، «القاپتان سورەگە دەيىن» جوباسىن جۇزەگە اسىرۋعا 1 ميلليارد تەڭگە بولىنگەن. وڭىردە 31 الەۋمەتتىك پاۆيلون اشىلعان. تاعى 12 نىسان اشۋ جوسپارلانىپ وتىر. وبلىس اكىمىنىڭ ەسەبىن تىڭداعان پرەزيدەنت ءوڭىردى دامىتۋدىڭ باسىم باعىتتارىن بەلگىلەپ بەردى.
«بايانداماڭىز قابىلداندى. جالپى بۇل وبلىس قارقىندى دامىپ كەلە جاتىر. ءوسىم بار. شەشىلمەگەن ماسەلەلەر دە بار. ونسىز بولمايدى. ۇسىنىستارىڭىزدى قاراستىرىپ، ماسەلەلەردىڭ وڭ شەشىلۋىن ءوزىم باقىلاۋعا الامىن. كەلەسى جىلدىڭ باسىندا وبلىسقا كەلۋ جوسپارىمدا بار. سول كەزدە ناقتى ماسەلەلەردى پىسىقتايمىز. ال ۆاكسينا جونىندە ايتاتىن بولساق، قازاقستان دۇنيەجۇزىندەگى ءوز ۆاكسيناسىن ويلاپ تاپقان ەڭ وزىق مەملەكەتتەردىڭ قاتارىنا قوسىلدى. بۇل جامبىل وبلىسىمەن تىكەلەي بايلانىستى. سوندىقتان قۇتتى بولسىن. اتقارىپ جاتقان ەڭبەكتەرىڭىزگە ريزاشىلىعىمدى بىلدىرەمىن»، - دەدى قاسىم- جومارت توقايەۆ.
ەسكە سالساق، ق ر پرەزيدەنتى جۇمىس ساپارىمەن جامبىل وبلىسىندا ءجۇر. مەملەكەت باسشىسى QazVac ۆاكسيناسىن شىعاراتىن قوردايداعى زاۋىتقا باردى.
