ق ر پرەزيدەنتى ۆاكسينا شىعاراتىن قوردايداعى زاۋىتقا باردى
قاسىم- جومارت توقايەۆتىڭ جامبىل وبلىسىنا جۇمىس ساپارى قورداي اۋدانىنداعى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنا قاراستى QazVac ۆاكسيناسىن شىعاراتىن بيوفارماتسيەۆتيكا زاۋىتىنىڭ قىزمەتىمەن تانىسۋدان باستالدى.
پرەزيدەنتكە ۆاكسينا ءوندىرىسىنىڭ تەحنولوگيالىق جەلىسى، زەرتحانالىق جابدىقتار مەن موبيلدى رەاكتورلار كورسەتىلدى. ينستيتۋتتىڭ باس ديرەكتورى كۇنسۇلۋ زاكاريا بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىن ودان ءارى دامىتۋ جوسپارى تۋرالى باياندادى.
زاۋىت وندىرىستىك تاجىريبە بويىنشا حالىقارالىق ستاندارتتارعا (GMP) ساي كەلەتىن يممۋنوبيولوگيالىق ءدارى- دارمەكتەر، ونىڭ ىشىندە كوروناۆيرۋس ىندەتىنە قارسى ۆاكسينا، تۇماۋعا، تۋبەركۋلەزگە، برۋتسەللەزگە، نودۋليارلى دەرماتيتكە جانە باسقا دا جۇقپالى اۋرۋلارعا قارسى ۆاكسينالار شىعاراتىن بولادى. جىلىنا بيوفارماتسيەۆتيكا پرەپاراتتارىنىڭ 30-دان 60 ميلليونعا دەيىن دوزاسىن ازىرلەۋ جوسپارلانىپ وتىر. جوبانىڭ جالپى قۇنى - 15,6 ميلليارد تەڭگە.
قاسىم- جومارت توقايەۆقا -16- قىركۇيەك كۇنى 100 مىڭ دوزا كولەمىندە ۆاكسينا قۇيۋ ءوندىرىسى ىسكە قوسىلعانى تۋرالى مالىمەت بەرىلدى. ت م د ەلدەرى اراسىندا قازاقستان مەن رەسەي عانا COVID-19 ىندەتىنە قارسى ۆاكسينا ءوندىرىسىن جولعا قويعان.
پرەزيدەنت زاۋىت قىزمەتكەرلەرىمەن اڭگىمەلەسۋ بارىسىندا جوبانىڭ ماڭىزدىلىعىن اتاپ ءوتىپ، وتاندىق ۆاكسينانىڭ كوروناۆيرۋس ىندەتىنە قارسى كۇرەسكە جانە حالىقتىڭ دەنساۋلىعىن كۇشەيتۋگە زور ۇلەس قوساتىنىنا سەنىم ءبىلدىردى.
- بارشاڭىزدى قۇتتىقتايمىن. شىن مانىندە، بۇل ۇلكەن جەتىستىك. ەلىمىز ءۇشىن قاجەتتى ءوندىرىس. نەگىزگى جۇمىس ورىندالدى. ءبارى دۇرىس. كەلەسى جىلى وسى جۇمىستى جالعاستىرامىز. بۇل ۆاكسينانى بىرىككەن اراب امىرلىكتەرىنە جانە باسقا دا مۇسىلمان ەلدەرىنە جىبەرەمىز. ۆاكسينامىز دۇنيە جۇزىندە مويىندالىپ جاتىر. سوندىقتان بارشاڭىزدى قۇتتىقتايمىن! ريزاشىلىعىمدى بىلدىرەمىن. بۇل - وتە كۇردەلى پروتسەسس، ءوندىرىس. شىن مانىندە، دۇنيەجۇزىندە، شەتەلدە مۇنداي ءوندىرىس جاساۋ ءۇشىن ءۇش- ءتورت جىل كەتەدى. ءبىز توعىز ايدىڭ ىشىندە جۇمىستى ورىندادىق. سوندىقتان ەڭبەكتەرىڭىز مەملەكەت تاراپىنان جوعارى باعالانادى، - دەدى قاسىم- جومارت توقايەۆ.
