ق ر ءبىلىم جانە عىلىم ءمينيسترى ۇستازدار قاۋىمىنا العىس ايتتى - ۆيدەو
«قىمباتتى ارىپتەستەر! سىزدەردى كاسىبي مەرەكەلەرىڭىز - مۇعالىمدەر كۇنىمەن شىن جۇرەكتەن قۇتتىقتايمىن. مۇعالىم ماماندىعى بۇكىل الەمدەگى ەڭ قۇرمەتتى، ەڭ اسىل ماماندىقتىڭ ءبىرى. سىزدەر بالالاردى ءبىلىم نارىمەن سۋسىنداتىپ، ولارعا ءتالىم- تاربيە بەرۋ بارىسىندا، ياعني ەلىمىزدىڭ دامۋىنا باعا جەتپەس ۇلەس قوسىپ كەلە جاتىرسىزدار. ويتكەنى مۇعالىم بالالاردى ءبىلىم الەمىنە جەتەلەيدى ءارى كەيىنگى بۋىن وكىلدەرىن تاربيەلەيدى»، - دەدى مينيستر. ونىڭ ايتۋىنشا، پاندەميا مۇعالىم جۇمىسىنىڭ ماڭىزدىلىعىن ايقىنداپ بەرگەن.
«اتا- انالار بالالاردى وقىتۋ قانشالىقتى قيىن ەكەنىن ءتۇسىنىپ، سەزىنىپ، مۇعالىمنىڭ وقۋشى ومىرىندە ماڭىزدى ورىن الاتىنىنا تاعى دا ءبىر مارتە كوز جەتكىزدى دەپ ايتا الامىن. ەل پرەزيدەنتى قاسىم- جومارت كەمەل ۇلى توقايەۆتىڭ قولداۋىنىڭ ارقاسىندا مۇعالىمدەردىڭ جالاقىسى ارتىپ، جاڭا قوسىمشا اقىلار مەن ساناتتار پايدا بولدى. ءبىز مۇعالىمدەردى وزىنە ءتان ەمەس فۋنكتسيالاردان جانە قاعازباستىلىقتان ارىلتۋ ءۇشىن جۇيەلى ءارى ناقتى شارالار قابىلدادىق. پەداگوگ مارتەبەسىن كوتەرۋ بويىنشا ءارى قاراي دا جۇمىستى جالعاستىرامىز»، - دەگەن ۆەدومستۆو باسشىسى بيىل تاۋەلسىزدىكتىڭ 30 جىلدىعى ەكەنىن ەسكە سالدى.
«وسى ۋاقىت ارالىعىندا ەلىمىزدە ايتارلىقتاي ۇلكەن- ۇلكەن وزگەرىستەر بولدى. ءبىلىم بەرۋ جۇيەسى دە وزگەردى. ءبىلىمىمىزدى شىڭداپ، جاڭا داعدىلاردى يگەردىك. بۇل جەتىستىكتەرگە قول جەتكىزۋدە ءبىزدىڭ ارىپتەستەرىمىز - مۇعالىمدەردىڭ ەڭبەگى مەن كاسىبيلىگىنىڭ ۇلەسى وتە زور. قىمباتتى ارىپتەستەر، سىزدەردى كاسىبي مەرەكەلەرىڭىزبەن قۇتتىقتاپ، زور دەنساۋلىق، سارقىلماس كۇش- قۋات، شابىت، شىعارماشىلىق تابىس تىلەيمىن. قىمباتتى ارىپتەستەر! قاجىرلى ەڭبەكتەرىڭىز، شىدامدىلىقتارىڭىز جانە بالالارعا دەگەن سۇيىسپەنشىلىكتەرىڭىز ءۇشىن العىس ايتامىن. مەرەكە قۇتتى بولسىن»، - دەدى اسحات ايماعامبەتوۆ.
