پرەزيدەنت قازاقستاننىڭ ورمان القابىن ارتتىرۋعا قاتىستى پىكىر ءبىلدىردى
پرەزيدەنت فورۋم بارىسىندا قازاقستان ورمانى از مەملەكەتتەر قاتارىندا ەكەنىن ەسكە سالدى. ورمان قورى الاڭى 30 ميلليون گەكتاردى قۇرايدى نەمەسە اۋماقتىڭ 11 پايىزى شاماسىندا.
«بيىل ەلدى جاسىلداندىرۋ بويىنشا اۋقىمدى باعدارلاما باستاۋ الدى. 2025 -جىلعا دەيىن 2 ميلليارد اعاش وتىرعىزۋ جوسپارلانعان»، - دەدى ق. توقايەۆ.
سونىمەن قاتار مەملەكەت باسشىسى ارال تەڭىزىنىڭ قۇرعاۋى ءىرى ەكولوگيالىق اپات بولعانىن، وسى ورايدا تۇزدى شولەيتتەر پايدا بولعانىن ايتتى. شاڭدى داۋىلدار اتموسفەراعا ءىرى كولەمدە زياندى تۇزداردى شىعارادى. سوندىقتان ارالدىڭ قۇرعاعان جەرىندە سەكسەۋىل وتىرعىزۋدى ارتتىرۋ بويىنشا بولەك باعدارلاما قابىلدانعان. 2025 -جىلعا قاراي 1,5 ميلليون گەكتار قامتىلماق.
«قۇمدى داۋىلدار اتموسفەراعا قازاقستان بويىنشا عانا ەمەس، ورتالىق ازيا ەلدەرىنە دە توننا ۋلى تۇزداردى تاسىمالدايدى. سوندىقتان، وزبەكستاندىق ارىپتەستەرىمىزبەن بىرگە ارال تەڭىزىنىڭ قۇرعاعان تۇبىنە سەكسەۋىل وتىرعىزۋدى ۇلعايتۋ بويىنشا قازاقستانعا ارنالعان جەكە باعدارلاما قابىلدادىق. 2025 -جىلعا قاراي 1,5 ا گ ا جەردى قامتۋدى جوسپارلاپ وتىرمىز»، - دەدى قازاقستان پرەزيدەنتى.
بۇدان بۇرىن حابارلانعانداي، بۇگىن كوكشەتاۋدا مەملەكەت باسشىسى قاسىم- جومارت توقايەۆ پەن رەسەي پرەزيدەنتى ۆلاديمير پۋتيننىڭ قاتىسۋىمەن ەكى ەلدىڭ XVII ءوڭىرارالىق ىنتىماقتاستىق فورۋمى ونلاين فورماتتا ءوتىپ جاتىر.
اۆتور: رۋسلان عابباسوۆ
