توقايەۆ: مەملەكەتتىك شەكارانىڭ قاۋىپسىزدىگى - كەز كەلگەن مەملەكەتتىڭ باسىم باعىتى
«مەملەكەتتىك شەكارانىڭ قاۋىپسىزدىگىن قامتامسىز ەتۋ كەز كەلگەن مەملەكەتتىڭ ءسوزسىز باسىم باعىتى. قاۋىپسىزدىك شارالارىنا ءبىز تولىق تۇسىنىستىكپەن قارايمىز. اسىرەسە اۋعانستانداعى وقيعالار اياسىندا بۇل ماسەلەنىڭ ماڭىزدى ەكەنىن ءسىز، ۆلادميريم ۆلاديميروۆيچ، ۇجىمدىق قاۋىپسىزدىك كەلىسىم شارتى ۇيىمىنا مۇشە ەلدەردىڭ باسشىلارى وتىرىستارىنىڭ بىرىندە تاباندى ايتقان بولاتىنسىز. وتكىزۋ بەكەتتەرىن زاماناۋي ارنايى باقىلاۋ كەشەندەرمەن تولىقتاي جابدىقتاۋ كوممەرتسيالىق ءترانزيتتىڭ قاۋىپسىزدىگى مەن جىلدامدىق پروبلەماسىن دا شەشەر ەدى»، - دەدى مەملەكەت باسشىسى.
ىنتىماقتاستىق فورۋمىندا ق ر پرەزيدەنتى قاسىم- جومارت توقايەۆ كومىرتەگى بەيتاراپتىعى تۋرالى ستراتەگيانىڭ مۇمكىندىكتەرى تۋرالى پىكىر ءبىلدىردى.
«وندىرىستىك شىعارىندىلاردىڭ بالانسىن نولگە دەيىن جەتكىزۋ ونەركاسىپ پەن ەكونوميكادا قۇرىلىمدىق وزگەرىستەردى قاجەت ەتەدى. ول ءۇشىن ءبىز كومىرتەگىنىڭ ۇلەسى تومەن دامۋدىڭ ۇزاقمەرزىمدى ستراتەگياسىن دايىنداپ جاتىرمىز. رەسەي دە بۇل سالادا جەمىستى جۇمىس ىستەپ جاتىر. ءبىز سىزدەردىڭ ۇكىمەتتەرىڭىزدىڭ ارەكەتىن وتە مۇقيات باقىلاپ وتىرمىز. سوندىقتان، ەكى ەلدىڭ ۇكىمەتتەرى اتالمىش پروبلەما بويىنشا بىرگە جۇمىس ىستەپ، تاجىريبە مەن جوسپارلارىن الماسا الار ەدى. ەلدەرىمىزدىڭ ەكونوميكالارى ءۇشىن تەرىس اسەردى ازايتۋ ءۇشىن، ەڭ الدىمەن، دۇنيەجۇزىلىك ساۋدا ۇيىمى اياسىندا ەنگىزىلەتىن نورمالاردىڭ حالىقارالىق كەلىسىمدەرگە سايكەستىگىنە قاتىستى ورتاق ۇستانىمدى قالىپتاستىرۋ پايدالى بولار ەدى» - دەدى قاسىم- جومارت توقايەۆ قازاقستان مەن رەسەيدىڭ XVII ايماقارالىق ىنتىماقتاستىق فورۋمىندا.
ق ر پرەزيدەنتى وسى ماقساتقا جەتۋ جولىندا جاسالعان ءىس- شارالاردى اتاپ ءوتتى.
«ۇلتتىق دەڭگەيدە ۇلكەن تەحنولوگيالىق بەتبۇرىسقا دايىندىق اياسىندا ءبىز الدىڭعى قاتارلى حالىقارالىق ستاندارتتارعا سايكەس كەلەتىن جاڭا ەكولوگيالىق كودەكس قابىلدادىق. كاسىپورىندارعا ەكولوگيالىق تولەمدەردەن بوساتۋ ەسەبىنەن وندىرىستەردى جاڭعىرتۋعا مۇمكىندىك بەرىلدى. بۇل بيزنەسكە ەڭ وزىق قولجەتىمدى تەحنولوگيالاردى ەنگىزۋ ارقىلى بەلسەندى تەحنولوگيالىق جاڭارتۋدى جۇزەگە اسىرۋعا مۇمكىندىك بەرەدى»، - دەدى پرەزيدەنت.
