ماجىلىستە كاسپي تەڭىزىنە قاتىستى قۇجات ماقۇلداندى

نۇر-سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا «كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا قورشاعان ورتاعا ترانسشەكارالىق تۇرعىدان جاسالاتىن اسەردى باعالاۋ جونىندەگى حاتتامانى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

«قازاقستان كاسپي تەڭىزىنىڭ سولتۇستىك بولىگىندە ورنالاسقان. مامانداردىڭ پايىمىنشا، تەڭىزدىڭ وسى ايماعى قورشاعان ورتا تۇرعىسىنان كەرى اسەرلەرگە مەيلىنشە سەزىمتال، وسال بولىگى بولىپ ەسەپتەلەدى. سوندىقتان بۇل قۇجات ەلىمىز ءۇشىن وتە ماڭىزدى. كاسپي تەڭىزىندە كومىرسۋتەگى شيكىزاتىنىڭ ءىرى قورىنىڭ بولۋى وسى سۋ باسسەيىنىندەگى ەكولوگيالىق ءارى بيولوگيالىق رەسۋرستارىن ساقتاۋ ماسەلەسىن وزەكتى ەتەدى. قورشاعان ورتانى قورعاۋ سالاسىنداعى ىنتىماقتاستىقتى نىعايتۋ ماقساتىندا قازاقستان نەگىزدەمەلىك كونۆەنتسياعا قاتىستى ءبىرقاتار حاتتامالارعا قول قويدى. سولاردىڭ ءبىرى - كاسپي ماڭى مەملەكەتتەرى 2018 -جىلعى 20 شىلدەدەگى ماسكەۋدە قول قويعان قورشاعان ورتاعا اسەردى باعالاۋ جونىندەگى حاتتاما»، - دەدى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.

وسى ورايدا ول بۇل ترانسشەكارالىق كونتەكستەگى قۇجاتتى ازەربايجان، يران، قازاقستان، رەسەي جانە تۇرىكمەنستان قابىلداعانىن ەسكە سالدى. سونىمەن قاتار، وسى حاتتامانى رەتتەۋگە جاتاتىن قىزمەت تۇرلەرى انىقتالدى. ولار كەلەسىدەي: مۇناي وڭدەۋ زاۋىتتارى، جىلۋ قۋاتى 300 مەگاۆاتت نەمەسە ودان جوعارى جىلۋ ەلەكتر ستانتسيالارى مەن باسقا دا جاعۋ قوندىرعىلارى، اتوم ەلەكتر ستانتسيالارى، اۆتوموبيل جولدارىن سالۋ، رەكونسترۋكتسيالاۋ جانە كەڭەيتۋ.

«كونۆەنتسيا ەرەجەلەرىن ىسكە اسىرۋ ءۇشىن جاڭا ەكولوگيا كودەكسىندە ترانسشەكارالىق ەكولوگيالىق اسەردى رەتتەۋ، ولاردى جۇزەگە اسىرۋ ءتارتىبى، قۇقىقتارى مەن مىندەتتەرى قاراستىرىلعان. قازاقستان ترانسشەكارالىق اسەرلەردى باعالاۋعا قوزعالاتىن تاراپ رەتىندە قاتىسسا، وندا شىعۋ تاراپىنان كەلىپ تۇسكەن قۇجاتتار مينيسترلىكتىڭ ءبىرىڭعاي ەكولوگيالىق پورتالىندا (http://ecoportal.kz) ورنالاستىرىلادى. ءوز كەزەگىندە، مۇددەلى مەملەكەتتىك جانە جەرگىلىكتى اتقارۋشى ورگاندارعا قازاقستان رەسپۋبليكاسىنىڭ مەملەكەتتىك ورگاندارىنىڭ ەلەكتروندىق قۇجات اينالىمىنىڭ ءبىرىڭعاي جۇيەسى ارقىلى جىبەرىلەدى. ال ەگەر قازاقستان ترانسشەكارالىق اسەرلەردىڭ شىعۋ تاراپى رەتىندە قاتىسسا، وندا قورشاعان ورتاعا اسەردى باعالاۋ ءراسىمى ەلدىڭ ىشىندە عانا ەمەس، سونىمەن قوسا قوزعالاتىن تاراپتار دا قاتار جۇرگىزىلەدى. مىسالى، كاسپيدە جاڭا وبەكتىلەر سالىنعان جاعدايدا قورشاعان ورتاعا اسەردى باعالاۋ قۇجاتتارى ءتيىستى جەرگىلىكتى اتقارۋشى جانە مۇددەلى مەملەكەتتىك ورگاندارعا، سونداي-اق قوزعالاتىن تاراپتارعا قاتار جىبەرىلەدى. قوزعالاتىن تاراپتاردىڭ ورگاندارىمەن كونسۋلتاتسيالاردى ەسكەرە وتىرىپ، قورشاعان ورتاعا اسەردى باعالاۋدى وتكىزۋ مەرزىمى شامامەن 6-ايدى (180 كۇن) قۇرايدى. بۇل قورشاعان ورتاعا اسەردى باعالاۋ حاتتاماسىندا جانە ەكولوگيا كودەكسىنىڭ 81-بابىنىڭ 7-تارماعىندا ايقىندالعان»، - دەدى مينيستر.

ونىڭ سوزىنە قاراعاندا، قوعامدىق تىڭداۋلاردا كوتەرىلگەن ماسەلەلەر بويىنشا تۇپكىلىكتى شەشىمدى قورشاعان ورتانى قورعاۋ سالاسىنداعى ۋاكىلەتتى ورگان قابىلدايدى.

«حاتتامانى راتيفيكاتسيالاۋ تەرىس الەۋمەتتىك- ەكونوميكالىق، قۇقىقتىق، ەكولوگيالىق سالدارعا اكەپ سوقتىرمايدى. رەسپۋبليكالىق بيۋدجەتتەن قوسىمشا قارجىلىق شىعىنداردى قاجەت ەتپەيدى»، - دەدى ۆەدومستۆو باسشىسى.