ۇكىمەت باسشىسى باعا ءوسىمى بولعان ءوڭىر اكىمدىكتەرىن سىنعا الدى

نۇر-سۇلتان. قازاقپارات - بۇگىن ۇكىمەت وتىرىسىندا پرەمەر- مينيستر اسقار مامين باعا ءوسىمى بولعان ءوڭىر اكىمدىكتەرىن سىنعا الدى، دەپ حابارلايدى قازاقپارات ءتىلشىسى.

«سونىمەن قاتار، وسى جىلعى شىلدەدە ينفلياتسيا ءوستى. ينفلياتسيانىڭ وسۋىنە ازىق-تۇلىك تاۋارلارىنىڭ قىمباتتاۋى كوپ اسەر ەتتى، باعا 2020 -جىلمەن سالىستىرعاندا 11 پايىزعا وسكەن. باعانىڭ ەلەۋلى قىمباتتاۋى تۇركىستان وبلىسىندا، نۇر-سۇلتاندا جانە قاراعاندى وبلىسىندا بايقالدى. بۇل - ەڭ الدىمەن، اكىمدىكتەر تاراپىنان شارالار جەتكىلىكتى قابىلدانبايدى دەگەن ءسوز. شارالاردى كۇشەيتىپ، ەرەكشە باقىلاۋعا الۋ قاجەت»، - دەدى ا. مامين.

سونىمەن قاتار ول الەۋمەتتىك ماڭىزى بار تاۋارلار باعاسىن تۇراقتاندىرۋ بويىنشا تاپسىرما بەردى. «ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ، وسى جىلعى تامىزدىڭ سوڭىنا دەيىن ينفلياتسياعا قارسى دەن قويۋ شارالار كەشەنىن، سونىڭ ىشىندە الەۋمەتتىك ماڭىزى بار تاۋارلار باعاسىن وسىرمەۋ بويىنشا جاڭا شارالار كەشەنىن قابىلداپ، ونىڭ ىسكە اسىرۋدى باستاۋعا تاپسىرامىن. بارلىق وڭىرلەر جوسپارلانعان الەۋمەتتىك- ەكونوميكالىق دامۋ كورسەتكىشتەرىنە قول جەتكىزۋدى جانە مەملەكەت باسشىسى بەلگىلەگەن مىندەتتەردى ءتيىمدى ىسكە اسىرۋدى قامتاماسىز ەتۋى قاجەت»، - دەدى ۇكىمەت باسشىسى.