قۇربان ايت: كوميتەت قازاقستاندىقتارعا ۇندەۋ جاسادى

«قۇربان ايتتىڭ كوپتەگەن ازاماتتارىمىز ءۇشىن ماڭىزى زور جانە ءبىز ءدىني نانىمداعى جانداردىڭ سەزىمدەرىنە زور قۇرمەتپەن قارايمىز. الايدا پاندەميا حالىقتىڭ دەنساۋلىعىنا قاۋىپ توندىرەدى. قازىرگى تاڭدا ەپيدەميولوگيالىق جاعدايدىڭ ناشارلاۋىنا بايلانىستى باس مەملەكەتتىك سانيتارلىق دارىگەردىڭ قاۋلىسى بويىنشا بارلىق قوعامدىق ءىس-شارالاردى مەرەكەلەۋ شەكتەلگەن. ءبىز قالىپتاسقان جاعدايدا ازاماتتارىمىزدىڭ قاۋىپسىزدىگى مەن دەنساۋلىعى ءبىرىنشى ورىنعا شىعاتىنىن تۇسىنۋگە ءتيىسپىز»، - دەلىنگەن ۇنەۋدە.

كوميتەتتىڭ رەسمي وكىلى وسىعان بايلانىستى بارشا قازاقستاندىقتاردى جاعدايعا تۇسىنىستىكپەن قاراپ، قۇربان ايت قارساڭىندا شاعىن وتباسىلىق شەڭبەردە مەرەكەلىك ءىس-شارالار وتكىزۋگە، بارلىق بايلانىستاردى ازايتۋعا، بۇقارالىق ءىس-شارالاردى، ادامدار كوپ جينالاتىن راسىمدەر ۇيىمداستىرماۋعا جانە ونداي شارالارعا بارماۋعا كەڭەس بەرەدى.

سونىمەن قاتار، رەسپۋبليكانىڭ بارلىق ايماقتارىندا كوروناۆيرۋستىڭ دەلتا-شتامى انىقتالعانىن، ونىڭ ادەتتەگى شتامعا قاراعاندا 60 پايىزعا جۇقپالى جانە اۋىر اسقىنۋلارعا اكەلۋى مۇمكىن ەكەنىن ەسكە سالادى.

«بيىل ەكىنشى جىل قاتارىنان قازاقستاندىقتار قۇرباندىق شالۋ ءراسىمىن ونلاين فورماتتا جاساي الادى. ول ءۇشىن qurban2021.kz. سايتىندا ءوتىنىم قالدىرۋ قاجەت. ەپيدەميولوگيالىق جاعدايعا بايلانىستى قۇرباندىق ەتى مۇقتاجدار اراسىندا تولىعىمەن تاراتىلادى. سونىمەن قاتار، كارانتيندىك تالاپتاردى قاتاڭ ساقتاۋعا، بەتپەردە كيۋگە، الەۋمەتتىك قاشىقتىقتى ساقتاۋعا، قولدى ءجيى وڭدەۋگە، ادامدار كوپ جينالاتىن ورىندارعا بارماۋعا شاقىرامىز»، - دەيدى ەرجان بايتانايەۆ.