ۇلتتىق قور جيناقتاۋ رەجيمىنەن تۇتىنۋ رەجيمىنە ءوتتى - پرەزيدەنت

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ ۇلتتىق قوردان رەسپۋبليكالىق بيۋدجەتكە ترانسفەرت كولەمى ارتقانىن جانە شيكىزاتتىق ەمەس كىرىس كوزدەرىن ىزدەۋ قاجەتتىگىن ايتتى، دەپ حابارلايدى قازاقپارات ءتىلشىسى.

«بۇگىندە ۇلتتىق قور جيناقتاۋ رەجيمىنەن تۇتىنۋ رەجيمىنە ءوتتى. جىل سايىن ۇلتتىق قوردان رەسپۋبليكالىق بيۋدجەتكە ترانسفەرت كولەمى ءوسىپ كەلەدى. 2020 -جىلى ول بيۋدجەت كىرىسىنىڭ % 40- ىن قۇرادى. بيىل بۇل كورسەتكىش % 36 بولادى»، - دەدى ق. توقايەۆ.

پرەزيدەنت مەملەكەتتىك مىندەتتەمەلەر كولەمى ءوسىپ جاتقانىن ەسكە سالدى - داعدارىس كەزىندە بۇل ءسوزسىز بولادى. ورتا مەرزىمدى پەرسپەكتيۆادا شيكىزاتتىق ەمەس كىرىس كوزدەرىن ىزدەۋ قاجەت.

«قازىرگى ۋاقىتتا ەكسپورتتىق كەدەندىك باجدار تەك مۇناي مەن مۇناي ونىمدەرىنە عانا بەلگىلەنگەن. ءبىرقاتار باسقا شيكىزات پەن ارالىق تاۋارلارعا باعا كونيۋنكتۋراسى جاقساردى. ۇكىمەتكە ەكسپورتتىق كەدەندىك باجدار قولدانىلۋى مۇمكىن تاۋارلاردىڭ تىزبەسىن كەڭەيتۋ مۇمكىندىگىن تالداۋ تاپسىرىلادى. بۇل ىشكى نارىققا جەتكىزىلىمدەردى ىنتالاندىرۋى مۇمكىن. ياعني قۇرىلىس ماتەريالدارىنىڭ باعاسى ماسەلەسىن، وڭدەۋ ونەركاسىبىن قولجەتىمدى شيكىزاتپەن جۇكتەۋ ماسەلەسىن شەشۋگە كومەكتەسەدى. ۇسىنىستار مەن ەسەپتەرىڭىزدى دايىنداڭىزدار، سودان كەيىن ناقتى شەشىم قابىلدانادى»، - دەدى قاسىم- جومارت توقايەۆ.

ايتا كەتەيىك، مەملەكەت باسشىسى قاسىم- جومارت توقايەۆتىڭ توراعالىمەن ۇكىمەتتىڭ كەڭەيتىلگەن وتىرىسى ءوتتى.

اۆتور: ايجان سەرىكجان قىزى