ەلوردادا ءبىرقاتار نىسان جۇمىسىن توقتاتادى - جاڭا قاۋلى ازىرلەنىپ جاتىر

نۇر-سۇلتان. قازاقپارات - ەلورداداعى قولايسىز ەپيدەميولوگيالىق احۋالعا بايلانىستى كارانتين ءىس- شارالارى ءتورتىنشى رەت قاتاڭداتىلماق، دەپ حابارلايدى قازاقپارات ءتىلشىسى.

نۇرسۇلتان قالالىق اكىمدىگىنىڭ رەسمي سايتىندا جاريالانعان اقپاراتقا سايكەس، مونيتورينگ توپتار كۇشەيتىلگەن رەجيمدە كارانتين ءىس- شارالارىنىڭ ساقتالۋىن قاداعالاۋ جۇمىسىن جۇرگىزىپ جاتىر. سونىمەن قاتار Ashyq جوباسىنا كىرگەن نىسانداردىڭ جۇمىس ساپاسىن باقىلاۋ دا قاتاڭداتىلعان.

«وسىلايشا، جابىق ساياجايلار مەن اكۆاپاركتەردىڭ، ونىڭ ىشىندە باسسەيندەردىڭ، قالالىق ساياجايلاردىڭ، اشىق اۋاداعى اكۆاپاركتەردىڭ، سەرۋەندەۋگە سۋدا جۇزەتىن كەمەلەردىڭ (تەپلوحود، كاتەر، قايىق، كاتاماران، سۋ سكۋتەرى جانە ت. ب. )، كينوتەاترلاردىڭ جۇمىسىنا تىيىم سالىنادى. تۇنگى كلۋبتاردىڭ Ashyq جوباسى اياسىندا جۇمىس ىستەۋىنە تىيىم سالىنعاندىقتان ولار دا جۇمىس ىستەمەيدى. Ashyq جوباسىنسىز جۇمىس ىستەيتىن جازعى الاڭدار دەمالىس كۇندەرى جۇمىسىن توقتاتدى. سونىمەن قاتار دەمالىس كۇنى قوعامدىق كولىكتەر جۇرمەيدى. اۆتوبۋستار زارارسىزداندىرىلادى»، - دەپ اتاپ ءوتتى اكىمدىكتەن.

مۇنان بولەك، ورنالاسقان جەرىنە قاراماستان مەيرامحانا، ءدامحانا، كوفەينيا ۇلگىسىندەگى قوعامدىق تاماقتانۋ نىساندارىنا (Ashyq جوباسىنا قاتىسپايتىن) جۇمىس كۇندەرى ساعات 07.00-دەن 20.00-گە دەيىن جۇمىس ىستەۋىنە رۇقسات بەرىلەدى جانە سەنبى، دەمالىس كۇندەرى جابىق بولادى. اشىق اۋادا قىزمەت كورسەتەتىن تاماقتانۋ ورىندارى جۇمىس كۇندەرى ساعات 07.00-دەن 22.00-گە دەيىن قىزمەت كورسەتەدى. ال سەنبى جانە دەمالىس كۇندەرى شتاتتى رەجيمدە تاپسىرىستى جەتكىزىپ بەرۋمەن عانا اينالىسا الادى.

ال Ashyq جوباسىنا قاتىساتىن قوعامدىق تاماقتانۋ نىساندارىنا عيماراتتىڭ ىشىندە جۇمىس كۇندەرى ساعات 07.00-دەن 22.00-گە دەيىن جۇمىس ىستەۋىنە رۇقسات بەرىلمەك. ءبىراق، سەنبى جانە جەكسەنبى كۇندەرى جۇمىس ىستەمەيدى. اشىق اۋاداعى تاماقتانۋ ورىندارىنا اپتا بويى ساعات 07.00-دەن 24.00-گە دەيىن رۇقسات بەرۋ ماسەلەسى قاراستىرىلىپ جاتىر.

اۆتور: مارلان جيەمباي