پرەزيدەنت ساتىبالدى نارىمبەتوۆتىڭ وتباسى مەن جاقىن تۋىستارىنا كوڭىل ايتتى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ كورنەكتى كينورەجيسسەر، جازۋشى، قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ يەگەرى ساتىبالدى نارىمبەتوۆتىڭ وتباسى مەن جاقىن تۋىستارىنا كوڭىل ايتتى، دەپ حابارلايدى قازاقپارات.

بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا جازدى.

- ساتىبالدى جالەل ۇلى قازاق كينوسىندا وزىندىك قولتاڭباسى بار، سۋرەتكەرلىك شەبەرلىگىن ۇدايى شىڭداپ وتىراتىن دارىندى رەجيسسەر ەدى. قوعامداعى كۇردەلى وزگەرىستەردى، زاماننىڭ جاڭارعان كەلبەتىن ەكران ارقىلى كورسەتە ءبىلدى. شىعارماشىلىق ىزدەنىستەر ناتيجەسىندە دۇنيەگە كەلگەن ءاربىر تۋىندىسى سىنشىلار مەن كورەرمەندەر تاراپىنان جوعارى باعاسىن الدى. سونداي-اق ءار جىلدارى جارىق كورگەن كىتاپتارىن وقىرماندار جىلى قابىلدادى. وتاندىق كينو ونەرىن جانە رۋحاني- مادەني سالانى دامىتۋعا مول ۇلەس قوسىپ، سوڭىنا جارقىن ءىز، وشپەس مۇرا قالدىرعان ساتىبالدى جالەل ۇلىنىڭ ەسىمى مەن بەينەسى حالقىمىزدىڭ جادىندا ساقتالادى. مارقۇمنىڭ جانى ءجانناتتا، يمانى سالامات بولسىن، - دەپ جازىلعان پرەزيدەنتتىڭ جەدەلحاتىندا.